Kryetari i Kuvendit të Kosovës, Kadri Veseli, njëherësh ushtrues detyre i kryetarit të PDK-së e ka përshëndetur deputetin Azem Syla, për aktin e dorëheqjes së tij nga posti i deputetit.
Në një postin në Facebook, Veseli i cili ka qenë bashkëpunëtor i ngushtë i Azem Sylës në UÇK dhe SHIK thekson se duhet hapur rruga dhe për hetime të tjera.
Postimi i plotë
“Përshëndes dhe përgëzoj deputetin e Kuvendit te Kosoves, z. Azem Syla, për aktin fisnik të dhënies së dorëheqjes prej mandatit të deputetit për ti hapur plotësisht rrugën organeve të drejtësisë në procesin e zbardhjes dhe trajtimit të çështjes së hapur ndaj tij. Me këtë veprim ai po vendos një precedent të ri të qytetarisë dhe përgjegjësisë publike që duhet të shërbejë si standard dhe model për të gjithë ata që gjenden në rrethana të ngjashme.
Prandaj unë inkurajoj të tjerë aktorë politikë dhe funksionarë të lartë shtetërorë, që gjenden para akuzave apo kanë çështje të tilla të hapura me drejtësinë, që të ndjekin rrugën e njëjtë dhe të tërhiqen nga detyrat e rëndësishme që kanë në mënyrë që ta lënë drejtësinë sa më të lirë në përmbushjen e detyrës së vetë”.
Azem Syla bashkë me 51 persona tjerë dyshohen se janë pjesë e një grupi të krimit të organizuar dhe po ndiqen për t’u arrestuar nga EULEX-i dhe Policia e Kosovës, përveç 6 personave që sot u është vendosur masa e paraburgimit prej një muaji.
/tesheshi.com/
