Në stadiumin Adem Jashari është mbajtur ceremonia kryesore me qytetarët e Mitrovicës dhe qytetarë nga Shqiperia që po marrin pjesë në rivarrimin e Isa Boletinit.
Së pari iu drejtua me një fjal rasti kreyparlamentari Kadri Veseli, i cili para personaliteteve të shumta të jetës publike të Kosovës, Shqipërisë dhe viseve të tjera, si dhe mijëra qytetarëve në stadiumin e qytetit në Mitrovicë, në fjalën e tij, vlerësoi lart kontributin atdhetar të tribunit popullor, Isa Boletini.
‘Derisa dje, në Kuvendin e Kosovës, po bënim homazhet për Isa Boletinin, mu kujtua një mendim i vjetër, sa vet historia: Heronjtë kthehen të fundit nga betejat. I tillë është Isa Boletini. Ai po kthehet sot, i fundit nga beteja e madhe për lirinë e Kosovës. Një shekull zgjati kjo betejë. Një shekull, nga Kaçaniku e n’ Boletin Kosova ishte e mbuluar me tym. Por Kosova më në fund u bë e Lirë. Por Kësaj lirie i mungonte diçka. I mungonte heroi i saj i madh, tribuni popullor – Isa Boletini’, theksoi kryetari Veseli.
Më tej në fjalë e tij, kryetari Veseli foli për rëndësinë e rrugës që ai trasoi për brezat pasardhës, duke qenë shembull i sakrificës dhe përkushtimit për atdhe.
‘Në kancelaritë diplomatike të perëndimit, ku dikur e çove zanin e Kosovës, sot janë miqtë më të mirë të lirisë dhe të shtetit tonë. Ne po punojmë bashkë me ta, që Kosovën ta bëjmë përditë e më të mirë, më të sigurt, më demokratike, më prosperuese për të gjithë qytetarët e saj, pavarësisht dallimeve etnike apo fetare që ata kanë. Është koha të rehatohesh edhe ti Bacë. Të jesh mirë, sepse mirë janë, edhe Kosova, edhe Shqipnia!’, theksoi në fund të fjalës së tij kryetari Kadri Veseli.
