Kryetari i Kuvendit të Kosovës, Kadri Veseli, për herë të parë pranon se vendi mund të shkoj në zgjedhje, për çka ai jo zyrtarisht ka kohë që ka nisur fushatë parazgjedhore pasi çdo ditë po takon biznese të ndryshme.
Kështu, Veseli jo-zyrtarisht ka treguar dëshirën e tij të pathënë, por të ditur për opinionin publik, se synimi i tij është që të ulet në karrigën e kryeministrit.
Veseli, në një intervistë të dhënë për gazetën “Koha Ditore”, e lë të hapur mundësinë që rrugëdalja nga kriza politike të kërkohet edhe nëpërmjet zgjedhjeve të parakohshme, me kushtin që për një gjë të tillë të ketë një marrëveshje politike mes partive kryesore parlamentare.
“Nuk është fundi i botës nëse nesër del një opsion me marrëveshje politike në mes të kampit të pozitës dhe opozitës që të shkohet në zgjedhje dhe të kemi normalitet”, ka thënë kreu i PDK-së.
Kryeparlamentari poashtu është dorëzuar sa i përket çështjes së ratifikimit të Demarkacionit. Ai pranon se koalicioni qeverisës PDK-LDK nuk i ka votat për ta ratifikuar marrëveshjen për demarkaimin e kufirit me Malin e Zi.
Me gjithë faktin se vlerëson që miratimi i Demarkacionit është në interesin shtetëror të Kosovës, Veseli e pranon se ka gjasa që kjo çështje të mbetet pezull.
Me këtë deklaratë, Veseli rrëzon të gjitha qëndrimet e partnerit të koalicionit por edhe të disa bashkëpartiakëve të tij që në vazhdimësi janë deklaruar se votat për çështjen në fjalë nuk mungojnë. /tesheshi.com/
