Kryetari i Partisë Demokratike të Kosovës, Kadri Veseli, ka hequr nga të gjitha pozitat partiake dhe institucionale zyrtarët dhe funksionarët e partisë së tij që kanë aktakuza nga institucionet e drejtësisë.
Veseli njoftoi se ka liruar nga detyra të gjithë të emëruarit e PDK-së që kanë aktakuza dhe që mbajnë pozita në institucionet publike.
Me këtë vendim sot janë liruar nga detyra ministri i Inovacionit dhe Ndërmarrësisë, Besim Beqaj, zëvendësministri i FSK-së Agim Çeku dhe anëtari i PDK-së, Nijazi Kryeziu.
“Duke treguar përkushtimin tim dhe vizionin si Kryetar i Partisë Demokratike të Kosovës, kam vendosur që: Të emëruarit politikë nga radhët e PDK-së në institucionet publike të Kosovës, të cilët kanë aktakuza që ndërlidhen me dyshime për keqpërdorim të pozitës zyrtare, korrupsion, ose nepotizëm, t’i lirojnë funksionet menjëherë”.
Kreu i PDK-së po ashtu ka konfirmuar se partia që drejton nuk do të kandidoj e as nuk do të mbështesë kandidatët e asnjë subjekti politik që kanë aktakuza të konfirmuara.
Ai tha se këtë po e bën për hir të luftës kundër korrupsionit, problem ky i cekur vazhdimisht edhe në arsyet për mos heqjen e vizave për Kosovën. /tesheshi.com/
