Kryetari i PDK-së, Kadri Veseli nëpërmjet një postimi në Facebook ka folur për koalicionin e lidhur me AAK-në dhe NISMA-n, për të cilin thotë se është në interesin më të mirë të vendit. Ai ka paraparë fitore të këtij koalicioni derisa ka paralajmëruar jetësimin e një fillimi të ri për Kosovën.
Por Veseli nuk ka treguar nëse u tërhoq nga kandidatura për kryeministër dhe pranojë Haradinajn, nga frika se PDK e vetme do humbte zgjedhjet, pas bashkimit të LDK-së, AKR-së dhe VV-së.
“E kam thënë më herët, po edhe sot – Partia Demokratike e Kosovës është partia që i vendos interesat e qytetarëve të Kosovës para çfarëdo interesi politik. PDK është partia e veprimeve dhe e vendimeve. PDK është partia që shënon rezultate për të mirën e të gjithë qytetarëve tanë. Si kryetar i PDK-së, gjithmonë i kam vendosur interesat e qytetarëve të Kosovës si prioritet kryesor. Koalicioni me AAK-në dhe NISMA-n është në interesin më të mirë të Kosovës dhe ne do ta shënojmë fitoren më të madhe ndonjëherë. Ne jemi një ekip udhëheqës që mund të marrë vendime dhe të arrijë rezultate për vendin.
Ekipi ynë udhëheqës do ta jetësojë Fillimin e Ri për Kosovën, ku gratë dhe të rinjtë janë të barabartë në tregun e punës dhe në shoqërinë tonë në përgjithësi. Ne duhet të investojmë në bujqësi, t’i fuqizojmë grate dhe të rinjtë tanë, ne do ta integrojmë Kosovën plotësisht në BE dhe NATO. Ju bëj thirrje të gjithë qytetarëve tanë, pa dallim, që fuqishëm t’i bashkoheni dhe ta përqafoni platformën tonë fituese që, më 12 qershor, së bashku t’i dhurojmë Kosovës Fillimin e Ri”, ka shkruar Veseli.
Kujtojmë se mbrëmë, nënkryetari i PDK-së, Memli Krasniqi, në një emision televiziv deklaroi se partia e tyre nuk do e japë më kryeministrin, por vetëm pak orë pas kësaj deklarate kjo parti pranojë që Haradinaj të jetë kandidat i koalicionit për çka befasoj jo pak opinionin. /tesheshi.com/
