Nga Blendi Gashi
Kryetari i PDK-së, Kadri Veseli, i ka thurrur vlerësime të shumta Bajram Rexhepit, i cili ndërroi jetë sot në një nga spitalet e Turqisë.
Veseli e ka cilësuar Rexhepin si një njeri të madh që i shërbeu çdo herë vendit.
“Kontributi i tij për Kosovën ishte i madh dhe populli i Kosovës do t´a mbaj Bajramin si një njeri punëtor dhe shumë të përgjeshëm. Si i tillë, Bajrami do të mbetet i paharrueshëm”, ka shkruar Veseli ndërsa ka ngushëlluar familjarët.
Por në mars të vitit 2015-të, Veseli jo pak kishte goditur Rexhepin pasi ky i fundit e quajti Veselin e keqja jo vetëm e PDK-së por edhe tërë shtetin duke e akuzuar për kapje të institucioneve.
Veseli i pyetur nga gazetarët për akuzat e Rexhepit, duke aluduar në pozitat që ka mbajtur ky i fundit, deklaroi se “unë nuk kam karamele t’i jap askujt”, që nënkuptonte se nuk mund t’i jepte pozita të larta shtetërore Rexhepit edhe pse Thaçi e ka bërë një gjë të tillë.
“Në qoftë se jam i ziu, i bardhi kur dëshiron mundet të bëhet ministër, realisht siç i ka bërë të tjerët. Ajo çfarë dëshiroj të them e që është kryesore, të gjithë ne jemi të thirrur në përgjegjësinë institucionale, për më tepër që dikush ka pasur përgjegjësi aktive institucionale, të jetë më i qetë, më i vëmendshëm. Dielli u duhet të gjithë qytetarëve të Republikës së Kosovës, jo vetëm një individi. Ajo që është kryesore, veçanërisht partisë sime i duhen reforma të thella, me njerëz të rinj, me përgjegjësi të reja të cilët do t’u japin shpresë të gjithë qytetarëve për integrime euroatlantike”, ishte përgjigjur Veseli.
E nuk shkoi shumë kohë, Rexhepi tha se ka refuzuar postin e deputetit të PDK-së në Kuvendin e Kosovës.
“Po e kam refuzuar postin e deputetit, unë jam kthyer në kirurgji tani dhe kush është pas meje në listë le të vazhdojë”, pati deklaruar ai.
Megjithatë pas gjashtë muajsh, në nëntor të 2015-tës, mitrovicasit Veseli e Rexhepi rregulluan raportet mes tyre duke qëndruar me njëri-tjetrin në 16-vjetorin e themelimit të degës së PDK-së në Mitrovicë.
Ata gjatë gjithë kohës qëndruan së bashku në një tavolinë, madje edhe tortën e prenë së bashku.. /tesheshi.com/
