Dymbëdhjetë ditë pas largimit të Agron Selimajt nga AKI, presidenti Thaçi dhe kryeministri Mustafa kanë emëruar kryespiunin e ri. Ai është prishtinasi Driton Gashi. Ashtu edhe siç pritej, krerët e shtetit kanë vendosur në krye të intelegjencës një njeri që më parë ka shërbyer për njërën nga partitë e koalicionit.
Dhe Gashi është njeri më i afërt me PDK-në që e drejtoi Thaçi për 16 vite, sesa me LDK-në e Mustafës. Kështu thotë të paktën biografia e tij zyrtare. Andaj, PDK tashmë që drejtohet nga Veseli triumfoi dhe një herë ndaj LDK-së, duke vendosur një njeri, të themi të tij, si kryespiun të vendit.
Emërimi i tij në këtë post tejet të rëndësishëm sigurisht është bërë për ta “djegur” atë pasi nuk është një emër aq i njohur në opinion, ndërsa jo zyrtarisht mësohet se shumë politikanë më të njohur nuk kanë pranuar të zënë vendin e Selimajt, pasi janë frikësuar se do i pret fati i tij, pra të detyrohen të dorëhiqen pa e përfunduar mandatin dhe sigurisht do u dëmtohej CV-ja.
Mbetet të shihet nëse Gashi do u bëj ballë stuhive të ndryshme që mund ta përfshijnë atë si kryespiun por edhe institucionin që drejton në vitet e ardhshme.
Po kush është shefi i ri i intelegjencës?
Është i lindur në Prishtinë në vitin 1977, ka të përfunduar master në Shkencat politike dhe ka një karrierë më së shumti prej këshilltari.
Që pas lufte, pra në vitet 2002-2003 është emëruar asistent i një prej shefave të grupit parlamentar prej njërës prej partive politike, por në CV nuk ka treguar se cilës parti.
Më pas në vitet 2004-2005 ka punuar si zv.drejtor për hulumtime kualitative të opinionit publik në Qendrën për studime politike.
Që nga tetori i vitit 2005 i është rikthyer punës në institucione, ku është emëruar zyrtarë i lartë për siguri publike në Zyrën e Kryeministrit, detyrë që e ka mbajtur deri më 2008.
Nga 2008 deri më 2010 ka punuar për UNDP-në si konsulent dhe këshilltar i saj në Ministrinë e Brendshme për çështje të anti-trafikimit me qenie njerëzore.
Më pas nga 2010 deri më 2013 është punësuar si i rregullt në Ministrinë e Punëve të Brendshme si drejtor i departamentit për siguri publike.
Gashi, ka qenë për një kohë edhe këshilltar i ish- ministrit të Brendshëm, Zenun Pajaziti, tani shef i grupit parlamentar të PDK-së, por këtë nuk e përmend në CV-në e tij.
Gashi, së fundi ishte sekretar i përgjithshëm në Ministrinë e Punëve të Brendshme, që tashmë drejtohet nga Skënder Hyseni i LDK-së. /tesheshi.com/
