Nga Blendi Gashi
Skandali i përgjimeve në Kosovë vazhdon të trondit opinionin publik, ku çdo ditë publikohen video të reja që tregojnë se si shefi i grupit parlamentar të PDK-së, Adem Grabovci është njeriu kryesor që me bashkëpartiakët e tij rehaton militantë të partisë në pozitë kyçe shtetërore.
Videoja e publikuar të premten tregon se si kjo parti ka vënë në pozita njerëz të saj në sistemin e drejtësisë për ta kontrolluar atë. Nga video-përgjimi i fundit mësohet se si Adem Grabovci bisedon me një person nga i cili merr rekomandim që Sali Mekajn ta emërojë kryetar të Gjykatës së Apelit, pasi ky i fundit vlerësohet njeri i guximshëm dhe që i duhet partisë. Dhe ashtu ka ndodhur Mekaj është emëruar në pozitën në fjalë.
Ndërsa qindra video do të vazhdojnë të publikohen, asnjë prej zyrtarëve të PDK-së që është pjesë e këtyre përgjimeve nuk e ka parë të udhës të japë dorëheqje.
Për më tepër, Adem Grabovci në një deklarim që ka bërë në Kuvend është mbrojtur duke thënë se “nuk është krim të punësohen njerëz”.
Është mëse e vërtetë se papunësia në Kosovë është alarmante dhe të rinjtë kanë nevojë për punë, por është krim në vete të punësohen militantë partiakë në pozita të ndryshme, edhe nëse nuk i plotësojnë kushtet, duke ua mohuar njerëzve profesionalë pozitën e caktuar.
Shumica e drejtuesve të PDK-së dhe njerëzit e përfshirë në aferën “Pronto 2”, lëre që nuk japin dorëheqje morale, por mbi të gjitha as nuk duan t’i komentojnë ato.
Pas Adem Grabovcit, e ish-ministrit të Arsimit, Ramë Buja për përgjimet ka folur më në fund edhe kryekuvendari, njëherit kryetari i PDK-së, Kadri Veseli, por jo edhe presidenti Hashim Thaçi që është urdhërdhënësi kryesor, ku sigurisht pa dijeninë e tij nuk ndërmerr asnjë veprim Grabovci.
Kreu i PDK-së me deklaratën e tij qartë tregon se ajo më shumë është bërë sa për të thënë se u prononcua për aferën “Pronto 2”, por jo për të thënë se do të japin përgjegjësi..
Veseli, me deklaratën e tij ku thotë se kjo është një praktikë e edhe e qeverive të kaluara përveç që është munduar të mbrohet, drejtëpërdrejt ka sulmuar edhe partnerin e koalicionit, LDK-në që qeverisi vendin për shtatë vjet dhe AAK-në për një kohë, se edhe këto dy parti në mënyrë të njëjtë kanë punësuar në pozitat e larta shtetërore njerëzit e vet.
“Është arsyetuar se ky fakt negativ i politizimit ka qenë pjesë e çdo qeverie të kaluar dhe e secilës parti politike në vend, që ka qenë në pushtet. Ne duhet ta pranojmë se është një fakt negativ në Kosovë, por kjo është një praktikë e vjetër. Merreni edhe çdo Komunë, dhe nga çdo parti politike”, ka thënë Veseli në një intervistë për televizionin publik.
Veseli, si njeriu më i fortë i PDK-së. por pse jo për momentin edhe në politikën në Kosovë, është dashur të tregojë se si mund të evitohet praktika e vjetër siç e quan ai politizimin e skajshëm.
Pra, Veseli me deklaratën e tij ka lënë të nënkuptohet se politizimi i institucioneve, ndërmarrjeve publike, sistemit të drejtësisë, universiteteve etj, nisi qysh në kohën e qeverisjes së LDK-së, nga paslufta, por nuk duhet harruar se pjesë e institucioneve pothuajse në vazhdimësi ka qenë edhe PDK, andaj gishti nuk mund të drejtohet vetëm ndaj një subjekti, pasi pjesë e të gjitha gjëra negative janë të gjitha partitë që kanë qenë në pushtet, përjashtu Lëvizjes Vetëvendosje.
Memorandum me ambasadën britanike për depolitizim, ç’efekt mund të ketë?
Kryekuvendari Kadri Veseli, një prej figurave kryesore të “Pronto 2”, i cili nuk foli për dhënien e përgjegjësisë për skandalin e përgjimeve, është zotuar se ka bërë hapa konkret për ta zhbërë praktikën e depolitizimit dhe nepotizimit, duke përmendur një memorandum që do të lidhet me ambasadën britanike në Kosovë, për të garantuar depolitizomi të bordeve të ndërmarrjeve publike.
Megjithatë. mbetet të shihet se sa do të jetë funksional memorandum i proklamuar nga kryeparlamentari Veseli për depolitizimin e ndërmarrjeve publike dhe jo vetëm, apo partia e tij më në krye Adem Grabovcin apo ndonjë zyrtarë tjetër do të vazhdojë të punësoj militantët partiakë në mbarë institucionet shtetërore.
Memorandumi në fjalë mund të ketë fatin e shumë të tillëve që përveç efektit të marketingut kinse po punohet diç, në të shumicën e rasteve mbesin veç në letër pasi nuk gjejnë zbatim. /tesheshi.com/
