Veprimtaria e Shërbimit Informativ të Kosovës (SHIK) dhe shoqërisë civile ka përplasur kryeparlamentarin Kadri Veseli dhe deputetin e LDK-së Driton Selmanaj.
E gjitha nisi pasi ky i fundit kërkoi nga Veseli që të mësojë rregulloren e Kuvendit dhe e këshilloi që të angazhojë këshilltarë, ndonëse, sipas tij, ka angazhuar mjaft.
Ndaj kësaj deklarate reagoi Veseli, i cili tha se nga ardhja e tij në krye të institucionit ligjvënës ka pasur transparencë lidhur me çdo informacion, ndërsa akuzoi Selmanajn se për vite është veshur me petkun e anëtarit shoqërisë civile, por ka mbajtur anë politike.
“Kemi marrë shumë partnerë donatorë, njëri nga ta më i fuqishmi është USAID, i cili është një nga organizatat më kredible. Gjithashtu një nga partnerët është KDI-ja, por realisht unë dua që të jem transparent, pasi kur shihja në televizor njërin prej personave të KDI-së, i cili shante dhe fyente.
Nuk e keni idenë, rri në Kuvend e shihte gjithë mundësinë që ishte publike, ndërsa ky (Selmanaj) vetëm dezinformonte.
Ishte fyerje, dhe besoni se njeriu duhet të jetë i vetëdijshëm dhe të ketë kujes me fyerjet individuale”, tha Veseli.
Kryekuvendari më tej tha se Selmanajn e kanë larguar nga KDI-ja, siç tha ai si manipulues është larguar dhe si keqpërdorues i shoqërisë civile.
“Nuk është mirë të luash rolin gjoja i pavarur dhe të mos jesh ashtu. Fol çfarë ke, ky shtet është sovran dhe ka institucione. Ka kalu e 81-ta, 82-ta, dhe dijeni se ky është Kuvend dhe duhet respektuar njerëzit. E ke tradhëtuar shoqërinë civile, je turp i shoqërisë civile, e cila meriton çdo respekt, por ti je turpi.
Po e personalizoj, pasi nuk ka gjë që s’është bërë e s’është fyer pikërisht nga ky person. Më vonë na doli nga ekspert në politikan. Mos manipulo me plagët e njerëzve, je shpifës i pasjellshëm, i padinjitet”, tha Veseli.
Por Selmanaj i është kundërpërgjigjur duke thënë se nuk është përjashtuar nga KDI, por është larguar vetë me dëshirë, përkundër që i është ofruar një pagë më e madhe.
Ai thotë se është pastërtia e tij personale është sikur loti dhe se është në gjendje të përgjigjet kur të jetë e nevojshme. /tesheshi.com/
