Një gjendje e tendosur shoqëron sot jugun e vendit, pasi në Bularat do të zhvillohen të 40-at e Kostandinos Kacifasit. Janë me dhjetra shtetas grekë që ashtu si ditën e varrimit të “heroit” të tyre, i janë drejtuar fshatit minoritar, por që një pjesë prej tyre janë ndaluar nga policia shqiptare në Kakavijë, duke u identifikuar si persona problematik, përfshirë dhe ata që janë shpallur zyrtarisht “non grata”.
Dita e varrimit të Kacifasit ishte njëherësh dhe një ditë e një fryme anti-shqiptare që karakterizoi ceremoninë mortore dhe ekziston frika se diçka e tillë mund të përsëritet, kësaj herë duke provokuar reagime nga popullata vendase. Një ditë më parë, një grupim patriotik me të rinj gjirokastritë, protestuan kundër vrasjeve të ndodhura së fundi në Greqi, ku viktima kanë mbetur dy emigrantë shqiptarë.
Kacifas u vra gjatë një këmbimi zjarri me policinë shqiptare, ende pa ndonjë arsye të qartë se pse atë ditë të para disa javëve morri armën dhe nisi të shtijë në ajër e më pas në automjetet e policisë, por që nga elementi minoritar e ai grek tej kufirit, u konsiderua “viktimë e pafajshme” apo deri dhe hero. /tesheshi.com/
