Nga Blendi Gashi
Ndonëse qeveria “Mustafa” është në largim dhe po mban mbledhjet e fundit, si kurrë më parë gjatë mandatit të rregullt ka ndodhur një përplasje mes ministrave të kabinetit qeveritar dhe kryeministrit.
Ministrja në detyrë për Dialog, Edita Tahiri ka akuzuar ministrin në detyrë të Financave, Avdullah Hoti se nuk po ndan mjete për zbatimin e marrëveshjeve për tabelat e veturave, me ç’rast ka kërkuar alokimin e mjeteve për zyrat e gjendjes civile në Zubin Potok, Zveçan e Leposaviq.
“Ministria e Financave e ka bllokuar, se ka financuar asnjëherë Ministrinë e Punëve të Brendshme për zbatimin e marrëveshjes në reciprocitet të tabelave dhe MPB ka gjetur përkohësisht buxhet përmes rialokimeve të brendshme, por Ministria e Financave asnjëherë nuk është përgjigj pozitivisht”, tha Tahiri.
Ndaj kësaj deklarate më pas reaguan Mustafa dhe Hoti, por që Tahiri ju kundërpërgj ashpër atyre, ndërsa foli fare pak dhe jo qartësisht ministri i Brendshëm Skënder Hyseni, i cili do duhej ose ta demantote Tahirin ose ta konfirmonte nëse me të vërtet ministria që drejton nuk është përkrahur.
“Këto shqetësime i kam ndarë edhe me minsitrin Hoti dhe zyrtarë të Ministrisë së Financave dhe janë në proces të qartësimit”, tha shkurt Hyseni.
Më pas fjalën e mori Hoti i cili tha se për çështje e zyrave civile në veriun e vendit mund të gjendet një zgjidhje brenda buxhetit dhe Ministrisë së Brendshme me rialokime.
“Për qartësim të ministres për dialog, unë nuk e bllokoj asnjë punë, vetëm e zbatoj buxhetin ashtu si është aprovu dhe për çdo vendim që marrë e sjelli në qeveri. Pra është me rëndësi që të mos bëjmë vlerësime kategorike se dikush bllokon një proces se nuk qëndron asnjë prej tyre”, tha Hoti.
Por Tahiri i tha Hotit se këto shqetësime ka mundur t’i thotë edhe më përpara por nuk e ka bërë që të mos duken si marketing politik.
“Unë kam komunikime me email me Ministrinë e Financave dhe mes tjerash i kam thënë se shtrirja e sovranitetin në veri të vendit nuk bëhet pa financa. Nëse dikush e mendon atëherë mund ta bëj, por unë e di se këto implementime kanë implikime financiare. I kam email-et por nuk e kam bërë më heret, tash është korrekt ta bëj, se fundi fundit jemi pjesë e një ekipi qeveritar që do të përfundojmë këtë punë dhe pse të mos i kryejmë këto që na kanë mbet”, theksoi Tahiri.
Në debat më pas u përfshi edhe kryeministri në largim Mustafa i cili i tha Tahirit se nuk është korrekte që ajo të flasë për Ministrinë e Brendshme dhe të thotë se është bllokuar, por këtë duhet ta bëj ministri i Brendshëm nëse konsideron se ka ndodhur një gjë e tillë.
Ndërsa Hyseni heshti, Tahiri i tha Mustafës se këto janë obligime të Brukselit.
Por Mustafa tha se këto marrëveshje i implementon MPB-ja, por që Tahiri ju kundërpërgjigj duke thënë se “unë kam përgjegjësi për zbatim së bashku me juve, por pasi jemi ka fundi kam dëshirë vërtet të dihen gjërat”.
Në linkun më poshtë mund të shikoni përplasjen mes Tahirit, Hotit e Mustafës:
