Presidenti i zgjedhur, Donald Trump ka nominuar guvernatoren e Karolinës së Jugut, Nikki Haley si ambasadore e Shteteve të Bashkuara në OKB, duke vlerësuar ish-kritiken e tij si një “negociatore të sprovuar”.
Ajo është e para femër jo e bardhë ndër zyrtarët e nivelit të lartë të kabinetit të caktuar për administratën e ardhshme të Donald Trump.
Haley është vajzë e emigrantëve indianë dhe ka qenë një kritike e zëshme e Trumpit gjatë fushatës elektorale.
Në një deklaratë për mediat, Trump thotë se: “Guvernatori Haley ka një histori të provuar se ka sjellë njerëzit së bashku pavarësisht ndasive partiake apo të origjinës, për të avancuar politika që shkojnë në përmirësimin e shtetit dhe vendit të saj”.
“Ajo është një negociatorë dhe mjeshtre e marrëveshjeve e sprovuar, dhe ne kërkojmë që të bëjmë shumë marrëveshje. Ajo do të jetë një lidere e madhe që do na përfaqësojë në skenën botërore”.
Guvernatorja e Karolinës së Jugut, Nikki Haley është zgjedhur edhe si zëvendëskryetare e shoqatës së guvernatorëve republikanë. Senati që kontrollohet nga republikanët do të konfirmojë kandidaturën e saj përpara se ajo të marrë zyrtarisht detyrën. Në një deklaratë, Haley theksoi se e ka pranuar nominimin dhe do të mbetet guvernatore e Karolinës së Jugut derisa të konfirmohet nga kongresi. Më parë, ajo kishte mbështetur senatorin e Floridës, Marco Rubio gjatë primareve brenda partisë Republikane, e më pas kishte mbështetur kandidaturën e senatorit Ted Cruz – rivalit final të Trump përpara se ai të shndërrohej zyrtarisht kandidat zyrtar.
Edhe pse Haley ka votuar për Trump, guvernatorja tha se nuk ishte një fanse as e kandidates demokrate, Hillary Clinton. Ajo ka sulmuar ashpër edhe propozimin e Trump për të ndaluar emigrantët muslimanë, duke e quajtur “sjellje anti-amerikane” sikundër edhe refuzimin e tij për të publikuar kthimin e taksave.
Nga ana e tij, Trump e ka cilësuar atë “shumë të dobët sa i takon emigracionit të paligjshëm” dhe tha se banorët e Karolinës së Jugut ndjeheshin të sikletosur prej saj. Por, presidenti i zgjedhur që pritet të inagurohet në janar, e ftoi atë për një takim në kullën Trump në Manhatan.
Haley ka pak përvojë të mëparshme në politikën e jashtme, edhe pse ka raportime në media se ajo ka ndërmarrë të paktën tetë vizita jashtë vendit që kur u bë guvernatore në vitin 2011, pjesa më e madhe në mbështetje të zhvillimit ekonomik të shtetit të saj.
Lindur me emrin Nimrata “Nikki” Randhaëa, Haley është e para guvernatore femër dhe nga minoritetet që qeveris Karolinën e Jugut, një shtet tepër konservator me një histori të gjatë konfliktesh rracore.
Detyra e përfaqësues së përhershme në OKB përfshin përfaqësimin e interesave amerikane. Ai anëtare e kabinetit, ambasadorja duhet të informojë presidentin për aktivitetet e OKB-së dhe të japë rekomandime për veprimet e shtetit.
Trump më herët ka kritikuar organizatën shumëpalëshe, duke thënë se OKB nuk është mik i Demokracisë, i lirisë e madje, as i Shteteve të Bashkuara.
Përgatiti: Juli Prifti – /tesheshi.com/
