Presidenti Ilir Meta po formëson kabinetin e tij, ndërsa duket se një pjesë e këshilltarëve të ish-Kreut të Shtetit, Bujar Nishani, do të vijojnë të mbajnë të njëjtat pozicione në Presidencë.
Pas konfirmimit të Flamur Gashit, i cili ka mbajtur postin e Këshilltarit nga 2012, kohë kur në krye të shtetit u zgjodh Bujar Nishani, një tjetër bashkëpunëtor i afërt i ish-Presidentit Nishani do të vijojë detyrën në të njëjtin pozicion.
Ylli Asllani përmes një njoftimi në rrjetet sociale ka bërë të ditur se do të vijojë të mbajë të njëjtin pozicion në kabinetin e Presidentit Ilir Meta, duke shprehur falenderime për vlerësimin dhe vendimin e Kreut të Shtetit, që morri zyrtarisht detyrën më 24 Korrik.
“Mirënjohje dhe falenderim Kryetarit të Shtetit për besimin, mirëkuptimin dhe vlerësimin!
Sh.T. Z President Meta kapërcen gardhet politike tradicionale për të dalë mbi palët duke i dhënë institucionit një qasje dhe dimension gjithëpërfshirës!
Një gjest që na obligon dhe jep sinjale për një Presidencë me kordinata e dinamikë të re dhe një konotacion bashkëkohor!
…. Shpesh liderat udhëheqin edhe me shembullin e akteve të tyre!”, shkruan Ylli Asllani. /tesheshi.com/
