Kryeministri Edi Rama disa herë ka ngritur pyetjen, në pritje të një përgjigjeje nga Lulzim Basha, nëse marrëveshja e 18 majit ka vdekur apo jo. Deri më sot, Basha nuk kishte reaguar kundrejt pyetjes që ngrinte Rama, ndërsa në seancën parlamentare të Kuvendit, kreu demokrat dha një përgjigje të prerë.
“Thelbi i marrëveshjes së 18 majit, ishin zgjedhjet e lira dhe të ndershme. Ndaj, dhe zgjedhjet e 25 qershorit shënuan edhe vdekjen e kësaj marrëveshjeje.
Aleanca e pandërprerë asnjë çast e “Rama1” me krimin dhe shitblerja e votave me paratë e drogës dhe të korrupsionit e vranë marrëveshjen dhe rikonfirmuan problemin numër 1 të Shqipërisë: vjedhjen dhe tjetërsimin e vullnetit të Shqiptarëve për hir të pushtetit personal dhe privat të Edi Ramës.
E vetmja gjë që arriti 18 maji është që 450.000 shqiptarë përfaqësohen sot këtu në këtë sallë nga opozita, nga Partia Demokratike. i vetmi sukses i 18 majit është që ti nuk arrite ta emërosh opozitën tënde, siç e kishe nisur dhe siç doje ta bitisje.
Opozita përfaqëson sot, votën më të pastër në historinë e pluralizmit, votë morale, që i rezistoi joshjes me para, presionit qeveritar, dhunës së grupeve kriminale! Nëse 25 qershori e vrau marrëvëshjen e 18 majit, 9 shtatori e varrosi atë përfundimisht”, tha Basha. /tesheshi.com/
