Në historinë e Shqipërisë, atë të kohëve modern, 21 janari është shenjuar si nëj datë tragjike me sfond politik – vrasja e katër protestuesve në boulevard, në krah të Kryeministrisë, në një protestë opozitare më 2011-ën, por ka dhe një 21 janar tjetër.
Kjo del në pah nga një e dhënë arkivore. Siç shkruhet nga Arkivi Shtetëror, se “si sot, më 21 janar 1925, Shqipëria u shpall për herë të parë Republikë Parlamentare”.
“Kjo datë ka hyrë në analet e historisë si tregues për vendosjen e republikës së parë shqiptare. Forma e re e qeverisjes së vendit u përligj përmes miratimit të Statutit të Republikës Shqiptare nga Asambleja Kushtetuese, në mars të vitit 1925. Për detyrën e kreut të shtetit u zgjodh Ahmet Zogu. Statuti sanksionoi konsolidimin e pavarësisë dhe jetësimin e parimeve demokratike kushtetuese.
Po ashtu, në Statut ligjëroheshin parimet dhe liritë demokratike, sikurse janë ndarja e pushteteve dhe liritë e të drejtat e njeriut. Një arritje e madhe e kohës ishte miratimi i Kodit Penal. Mandati i presidentit të Republikës ishte 7-vjeçar. Kjo formë republikane e qeverisjes zgjati deri në shtator të vitit 1928.
Më poshtë, dokumenti i korrespondencës së Prefekturës së Durrësit me Ministrinë e Punëve të Brendshme dhe Nënprefekturën e Shijakut, mbi dorëheqjen e Iljaz Vrionit dhe formimin e kabinetit të ri me Ahmet Zogun dhe shpallja e Republikës. Po ashtu, një fotografi nga ceremonia e betimit në Shkodër të ushtrisë para Zogut president”, thuhet nga Arkivi. /tesheshi.com/
