Në të gjithë Turqinë ka nisur sot votimi historik në referendumin për ndryshimet kushtetuese. Nëse votat për këto ndryshime kushtetuese do të mbizotërojnë në fund të ditës, atëherë sistemi qeverisës në Turqi nuk do të jetë më ai parlamentar, por presidencial.
Në mijëra qendra votimi në tërë vendin euroaziatik, 55.319.222 votues do të jenë në gjendje të hedhin votën e tyre për të vendosur mbi mënyrën e qeverisjes së tyre të ardhshme.
Të burgosurit mund të votojnë gjithashtu, ndërkohë që turqit jashtë vendit kanë votuar më herët në 120 qendra votimi në 57 vende.
Votimi do të mbyllet në një pjesë të vendit në katër të pasdites, e në 17:00 në pjesën tjetër.
Kryeministri turk, Binali Jëlldërëm, ka qenë ndër të parët mes zyrtarëve të lartë të vendit që ka votuar.
Në qendrën e votimit në Izmir, aty ku ai ka hedhur votën, u ka deklaruar gazetarëve e të pranishmëve: “Do ta respektojmë rezultatin, çfarëdo që të jetë. Zgjedhja e bërë nga populli është më e mira.”
Presidenti turk, Rexhep Tajjip Erdogan, ka votuar në Stamboll, ku është shprehur se votimi i sotëm nuk është një i tillë i zakonshëm, por që do të ndryshojë sistemin qeverisës ndërsa duhet që rritja e Turqisë të jetë më e shpejtë.
Fushata për referendumin nuk ka shkuar aq qetë, posaçërisht jashtë kufijve të Turqisë, në ato vende europiane ku ka një prani të madhe të qytetarëve turq. Tubimet e qeveritarëve turq janë penguar në Gjermani, Holandë e gjetkë, përpos një fushate të shfrenuar mediatike kundër votës “po” në referendum.
Kulmi i përplasjes u shënua në Holandë, ku një ministre turke nuk u lejua të futej as në konsullatën e vendit të saj dhe u nxor jashtë kufijve.
Pavarësisht tërë kësaj, sondazhet para referendumit flasin për një kryesim të mbështetësve të ndryshimeve kushtetuese. Pritshmëritë janë për një fitore të “po”-së.
Rezultati pritet të mësohet në orët e para të mbrëmjes. /tesheshi.com/
