Islanda është vlerësuar tashmë nga të gjithë si surpriza më e madhe e Europianit. Ajo do të renditej e dyta në grupin F, me një fitore e dy barazime. Do të barazonte me Portugalinë e Hungarinë, për të fituar më pas me Austrinë. Në ndeshjen e katërt të saj, në atë të një të tetave, Islanda do të bënte me turp Anglinë, duke e mundur dhe duke e nxjerrë jashtë aktivitetit. Në çerekfinale e pret Franca, një kundërshtar shumë i fortë, e po ashtu dhe skuadra e vendit organizator. Por islandezët nuk tuten, çka vërehet dhe në fjalët e bashkëtrajnerit, Lars Lagerback.
Islanda mendon të bëjë një surprizë tjetër të madhe të dielën në mbrëmje ndaj Francës në “Stade de France” të Parisit. Kjo është ajo që kërkon të thotë Lagerback në një konferencë shtypi.
Sipas tij, stili sulmues i skuadrës franceze mund të jetë në favor të islandezëve.
“Ata kanë një stil shumë sulmues, dhe kjo është diçka që mund të na japë ca mundësi. Ne do të përqendrohemi në lojën tonë. Por puna është se çfarë mund të bëjmë me topin kur ata të mos jenë në pozicionet e tyre. Ne jemi përmirësuar në këtë pjesë të lojës ndaj Anglisë, e duam të bëjmë edhe më mirë karshi Francës.”
Ish-trajneri i Suedisë nuk shpreh asnjë lëkundje në dëshirën për të fituar ndaj Francës.
“Synimi ynë është gjithmonë të fitojmë çdo ndeshje dhe të japim 100 për qind. Mund të jetë një klishe, por ne jemi të përqendruar vetëm në ndeshjen kundër Francës.”
Francë – Islandë do të jetë çerekfinalja e fundit, e do të luhet mbrëmjen e së dielës. /tesheshi.com/
