Sali Berisha dhe Lulzim Basha janë pjesë e parlamentit të ri, por në pozicione krejt të tjera nga ai i viteve më parë. Basha është kryetar i PD-së, ndërsa Berisha deputet i thjeshtë, pavarësisht se në legjislaturën e kaluar mbajti pothuajse i vetëm debatin me mazhorancën socialiste dhe qeverinë.
Tashmë në sallën e Kuvendit do të jenë të dy, kryetari në detyrë dhe ish-lideri historik i demokratëve, i tërhequr nga pozicionet drejtuese në PD pas humbjes së zgjedhjeve të 2013.
Tritan Shehu, i cili është rikthyer në Kuvend në këtë legjislaturë pas një shkëputjeje disa vjeçare, nuk sheh ndonjë problem në faktin se Berisha dhe Basha do të jenë në Kuvend.
Në një intervistë për Mapo-n, Shehu e cilëson praninë e Bashës dhe Berishës si një sinergji, që do i shërbejë jo vetëm opozitës, por edhe zhvillimeve pozitive.
Tashmë në sallën e Kuvendit të Shqipërisë do të jetë edhe kryetari i PD-së Lulzim Basha por aty është edhe Berisha. Dihet tashmë aktivizimi i fortë i Berishës në parlament. Besoni se do të vazhdojë të jetë i tillë apo do të ketë një “tjetër Berishë” këto katër vite në sallëne kuvendit, ndoshta më i prirur ti japë hapësirë Bashës…?
Pa asnjë dyshim prania tashmë e kryetarit të PD dhe të opozitës Z. Basha në sallën e Kuvendit ka shumë rëndësi, qoftë kjo për PD, qoftë në përgjithësi. Ndoshta kjo do të jetë dhe risia më e rendësishme e këtij Parlamenti, veçanërisht në fillimin e tij. Unë jam i bindur se Basha tashmë edhe në Kuvend do të ketë një rol thelbësor për zhvillimet brenda e jashtë sallës së Parlamentit tone. Por kjo nuk zbeh aspak rolin e askujt tjetër në grupin tonë, veçanërisht të z.Berisha. Ai ka vlerat e tij personale, historike, intelektuale, që i duhen e do t’i duhen jo vetëm PD, por dhe zhvillimeve pozitive të vendit e Rajonit. Duke i vënë në eficiencë këto, unë mendoj se kështu ne vetëm forcojmë veten tonë, PD, opozitën dhe i bëjmë ballë shumë më mirë revanshit të Rilindjes.
Besoni se do të ketë një farë dualiteti mes Bashës dhe Berishës?
Le te jemi me serioze. Midis Bashës e Berishës as ka dhe as mund të ketë asnjë “dualitet”. Unë mendoj se ka vetëm sinergji. Të dy ata, të gjithë ne, kemi një qëllim, jemi në një “varkë” dhe askush nuk zbeh rolin apo vlerat e tjetrit, aq më shumë po të flasim për Bashën e Berishën. Pra mos u shqetësoni për të tilla “komplikacione” se as nuk ka e as do të ketë të tilla. Përkundrazi do të ketë veçse bashkëpunim të ngushtë midis secilit nga ne, jo vetëm në grupin tonë parlamentar, por edhe me potencialet tona jashtë tij. /tesheshi.com/
