Titulli i pestë radhazi i Juventusit në kampionatin italian është tanimë punë e kryer, ndërsa vetëm mundësitë matematikore nuk i lënë torinezët të festojnë para kohe.
Një tjetër fitore ka korrur Juventusi një mbrëmje më herët, duke mposhtur 3-0 Lacion në kuadër të javës së 34-t të Serisë A. Një gol i shënuar nga kroati Mandzukic, e dy të tjerët nga Dybala, kanë shërbyer për këtë. E 26-ta fitore kjo për Juventusin në këtë sezon të kampionatit italian.
Skuadra kryesore rivale, Napoli, do të fitonte thellësisht të martën ndaj Bolonjës, 6-0, por ky rezultat i shërben më tepër ruajtjes së vendit të dytë, pasi napolitanët e kanë kuptuar se titulli u ka ikur nga duart.
Ndeshje e veçantë ka qenë ajo në stadiumin olimpik të kryeqytetit italian, ku Romës iu desh ta përmbyste dy herë rezultatin në favor të Torinos.
Totti mbush dyzet vjeç pas disa muajsh, por asgjë nuk e ndalon kapitenin roman të lërë gjurmë sa herë
që futet në lojë. Pak fare minuta në fushë, dhe aq i kanë mjaftuar për të shënuar dy herë ndaj Torinos e për t’î dhënë fitoren Romës.
Ai barazon shifrat me t’u futur në lojë, ndërsa duhen vetëm katër minuta për t’u mbyllur takimi. Tre minuta më pas vjen një tjetër gol i tij, këtë herë me 11-metërsh. Roma fiton 3-2. Totti ka shënuar tre gola në dy takimet e fundit. Spalletti e ai janë përplasur fizikisht në takimin ndaj Atalantës? Si zor, teksa Spalletti u pa të buzëqeshte kur Totti shënoi ndaj Torinos.
Me këtë fitore, Roma i forcoi pozitat në vend të tretë në klasifikimin e përgjithshëm, aq më tepër që Interi humbi ndaj Xhenovës në transfertë. Fitorja 1-0 e xhenovezëve ua pret shpresat interistëve për të siguruar pjesëmarrjen në Champions League sezonin e ardhshëm. /tesheshi.com/
