Në kërkim të trofeut të gjashtë radhazi të Serisë A, Juventusi ka vendosur një tjetër rekord, me 26 fitore të njëpasnjëshme.
Në orët e vona të së dielës, “Zonja e vjetër” priti Bolonjën, në të fundit takim të javës së 19-të të kampionatit italian.
Një takim aspak i vështirë për dominuesit e futbollit italian, që e mposhtën Bolonjën 3-0. Argjentinasi Higuan ishte shënuesi i dy prej golave, ndërsa tjetri u realizua nga Dybala me 11-metërsh.
Edhe pse me një ndeshje më pak, Juventusi e kryeson klasifikimin me katër pikë më shumë se Roma e vendit të dytë.
Fitorja e bëri Juventusin të thyejë rekordin e vet prej 25 fitoresh të pandërprera si skuadër pritëse në kampionat, të regjistruar gjatë kohës kur drejtohej nga Antonio Conte, nga gushti i 2013-s në nëntorin e 2014-s. /tesheshi.com/
