“Zonja e vjetër” ka bërë hapa të gabuar në këtë sezon të Serisë A në ndeshjet jashtë fushës së saj, por nuk ka ndodhur ende që të gabojë në shtëpi.
Përballja me Romën, ndjekësen më të afërt të Juventusit, pritej me interes pikërisht për të parë nëse skuadra kryeqytetase do të ishte në gjendje t’i ndalte kampionët e Italisë në pesë vitet e fundit.
Diçka që nuk ndodhi, pasi Juventusi fitoi 1-0 falë golit të Higuan-it, të shënuar pa u plotësuar ende çerekorëshi i parë i lojës. Një gol mjeshtëror i argjentinasit!
Fitorja ndaj Romës ishte e 25-ta radhazi për Juventusin në kampionat në fushën e vet. Një rekord që barazoi atë të vendosur nga vetë Juventusi në periudhën mes gushtit të 2013-s dhe nëntorit të 2014-s.
Torinezët e e kryesojnë tashmë bindshëm Serinë A, me shtatë pikë më shumë se Roma pas 17 javësh.
Juventusi bën një hap më tej përpara kështu drejt fitimit për të gjashtën herë rresht të kampionatit. Për Romën, fitorja në Torino ndaj Juventusit është kthyer në një mision të pamundur; romanët i kanë humbur gjashtë ndeshjet e fundit në transfertë në kampionat ndaj Juventusit. /tesheshi.com/
