Dukej se barazimi i dytë në kampionat, i dyti brenda pesë ditëve, ishte fare pranë për Juventusin në përballjen me Milanin, por një 11-metërsh i çasteve të fundit, i kthyer në gol nga Dybala, ka sjellë fitoren e 23-të në 28 javë për kryesuesit e kampionatit italian.
Sfida mes Juventusit dhe Milanit ishte e para e kësaj jave të 28-të të Serisë A. Pjesa e parë e saj do të mbyllej me nga një gol në secilën portë. Benatia në minutën e 30-të për vendasit, e Bacca në të 43-tën për miqtë, qenë shënuesit në barazimin 1-1.
Presioni i Juventusit u shtua fort në 45 minutat e dyta, shoqëruar me raste në portën e Milanit. Disa hapësira të krijuara prapa u dhanë mundësi miqve të rrezikonin gjithashtu, por pa arritur deri te konkretizimi.
Minutat shtesë u kthyen në dramatike, së pari prej një kartoni të kuq për Sosa-n e Milanit, e më pas nga dy raste të Higuain-it. Argjentinasi e nxori topin jashtë fillimisht, pas një goditjeje të mrekullueshme, e më pas një tjetër top i tij u ndal nga pritja e shkëlqyer e Donnarumma-s.
Pikërisht ky qe dhe momenti kur gjyqtari dha një 11-metërsh për një prekje me dorë të topit nga mbrojtësit e Milanit.
E dhënë në minutën e 94-t, penalltia u gjuajt në të 97-n pas protestave të udhëtuesve. Dybala goditi ngjitur me shtyllën në të djathtë të portierit, dhe rezultati u fiksua në 2-1 për Juventusin.
Kampionët në fuqi shkuan në kuotën e 70 pikëve, me Romën në ndjekje, në vend të dytë, me 11 pikë më pak. Milani mbetet në vend të shtatë, me 50 pikë. /tesheshi.com/
