Në një takim deri dikur të barabartë, Juventusi ka ditur të tregohet më pragmatik e të shënojë dy herë në portën e Interit. Fitorja 2-0 mbrëmjen e së dielës e çon në katër pikë diferencën mes Juventusit dhe Napolit në klasifikimin e Serisë A.
Pjesa e parë e sfidës do të kishte ngacmime të dyanshme, por anjëri ekip nuk qe në gjendje ta ndryshonte rezultatin. 45-minutëshi i dytë nisi menjëherë me gol. Bonucci ka lënë mbrojtjen e torinezëve dhe ka dalë në sulm, ku edhe shënon e u jep avantazhin të tijve.
Përpjekjet e udhëtuesve në vazhdim janë të pafrytshme, ndërsa shpresat për më së paku një barazim shuhen në minutën e 84-t, kur Alvaro Morata thellon rezultatin nga pika e 11-metërshit.
Deri para pak javësh i parë si një prej pretendentëve për titull, Interi gjendet aktualisht në vend të pestë, e rrezikon dhe pjesëmarrjen në Champions League sezonin e ardhshëm.
Sidoqoftë, Interi ka mundësi të marrë hak këtë të mërkurë, kur do ta presë Juventusin në “Giuseppe Meazza” në kuadër të gjysmëfinaleve të Kupës së Italisë. Takimi i parë i gjysmëfinales, i luajtur më 27 janar, ka përfunduar 3-0 për Juventusin.
Ndërkaq, Fiorentina e Napoli ndeshen sonte, në orën 21:00, në Firence, në ndeshjen e fundit të javës së njëzet e shtatë të kampionatit italian. /tesheshi.com/
