Kardifi pret më 3 qershor përplasjen e dy prej klubeve më të mira në Europë, përfaqësuese të futbollit italian e gjerman, por më parë Juventusi e Reali i Madridit i kanë mbyllur të dielën me sukses llogaritë në kampionatet e tyre.
Seria A mbetet nga të paktat kampionate ku do të ketë edhe një javë tjetër për t’u luajtur, ndërsa Juventusi ka hequr çdo mundësi matematikore për t’u kapur nga rivalët e afërt.
“Zonja e vjetër” ka mposhtur 3-0 Krotonen, për ta fituar kështu për herë të gjashtë rresht kampionatin në Itali, e për të tretën herë nën drejtimin e Massimiliano Allegri-t.
Ky ishte trofeu i siguruar i fituar në pak ditë, pas atij në Kupën e Italisë, ku Juventusi mposhti Lacion. Tripleta është tani një hap larg; mjafton një fitore në finalen e Champions League-s.
La Liga spanjolle ka mbyllur dyert të dielën me shpalljen kampion të Realit të Madridit. Një sukses që vjen pas pesë vitesh për madrilenët, i pari që nga sezoni 2011-2012.
Reali e pati futur veten në telashe dhe pati ngritur pikëpyetje mbi fatin e mëtejshëm të kampionatit kur më 23 prill pati humbur në “Santiago Bernabeu” 2-3 ndaj Barcelonës. Gjashtë fitore më tej, në gjashtë ndeshjet e fundit, i dhanë skuadrës së kryeqytetit spanjoll titullin.
Më e fundit fitore ishte ajo e së dielës, ndaj Malagës, në transfertë. Ronaldo dhe Benzema hoqën çdo
dyshim me golat e tyre; fitorja 0-2 e çoi Realin në kuotën e 93 pikëve, tre më shumë se Barcelona, që mundi 4-2 Eibarin.
Një rekord më vete për Realin në këtë sezon qe shënimi i një goli më së paku në çdo ndeshje të La Ligës, si kurrë më parë. E pas Lionel Messi-t, ylli portugez Cristiano Ronaldo u bë i dyti lojtar që shënon 25 apo më shumë gola në tetë sezone rresht të kampionatit spanjoll.
Në pritje tani është finalja e Champions League-s, në të cilën Reali i Madridit do të kërkojë sërish triumfin pas vetëm një viti. /tesheshi.com/
