Juventusi fitoi mbrëmë 1-0 ndaj Sassuolos dhe e çoi në gjashtë pikë diferencën me Napolin e vendit të dytë në Serinë A. Goli i Dybala-së, i 14-ti për të në këtë sezon të parë me torinezët, i dha tre pikë të çmuara skuadrës që pretendon të fitojë kampionatin e pestë radhazi në Itali.
Sassuolo është skuadra e vetme që e ka mundur Juventusin që nga fundit i tetorit të vitit të shkuar, e që atëherë “Zonja e Vjetër” ka fituar 18 e ka barazuar një në 19 takime.
Një meritë të madh në suksesin aktual të Juventusit ka dhe portieri veteran, 38-vjeçari Gianluigi Buffon, i cili e mbajti portën të paprekur për të dhjetën ndeshjen me radhë në kampionat.
Buffon nuk ka pësuar gol prej 926 minutash, dhe i duhen vetëm tre minuta të tjera që të thyejë rekordin e Sebastiano Rossi-t, ish-portierit të Milanit, të vendosur në vitin 1994.
Goli i fundit i shënuar në portën e Buffon-it në Serinë A i përket 10 janarit, në ndeshjen ndaj Sampdorias, me rrjetën të tundur nga Antonio Cassano. Ndërkaq, Buffon ka lënë tashmë pas një tjetër emër të madh të futbollit italian, portierin Dino Zoff, që në kohën e vet e pati ruajtur portën të paprekur për 903 minuta.
Buffon do të ketë mundësi ta thyejë rekordin e Rossit më 20 mars, në derbin e Torinos. /tesheshi.com/
