Një prej finalistëve të mbrëmjes së 3 qershorit në Kardif përcaktohet sonte, kur në Torino të ndeshen Juventusi me Monakon, në gjysmëfinalen e dytë midis tyre.
Fitorja 0-2 në takimin e së mërkurës së shkuar i jep përparësi Juventusit, që gjendet pranë finales së dytë brenda tre sezonesh.
Pasi bëhet gati të fitojë titullin e gjashtë radhazi në Serinë A, “zonja e vjetër” po kërkon me ngulm të lërë gjurmë dhe në Europë. Ka nxjerrë nga beteja Barcelonën, dhe tani ka karshi Monakon.
Tejet klinike, cinike, në gjysmëfinalen e parë, skuadrës italiane i mjafton një ndeshje ku të ruajë rezultatin e takimit të parë; diçka që di ta bëjë më së miri. Veç kësaj, një statistikë domethënëse është në krah të tyre: Monako nuk ka fituar asnjëherë në Itali!
Megjithatë, kujdesi është i nevojshëm. “Kurrë nuk i dihet në futboll, duhet të ruajmë përqendrimin. Monako nuk ka asgjë për të humbur; ka lojtarë cilësorë dhe po luan për një vend në finale,” nënvizon Massimiliano Allegri, trajneri i Juventusit, para ndeshjes.
“Do të bëjmë gjithçka që mundemi për të garantuar që kjo nuk është ndeshja jonë e fundit në këtë aktivitet. Duhet të luajmë lojën tonë, dhe të përpiqemi të shënojmë një gol në pjesën e parë,” shprehet në anën tjetër Leonardo Jardim, tekniku i skuadrës që kryeson kampionatin francez dhe që ka bërë një sezon të shkëlqyer.
Në daltë në finale, Juventusi do të ketë përsëri një skuadër spanjolle karshi, por jo Barcelonën si dy vite të shkuara. Këtë herë do të jetë ndryshe. Kundërshtari do të vijë nga kryeqyteti spanjoll: o Reali, o Atletiko!
Monako, përndryshe, ka historinë kundër: do duhet të fitojë në tokën italiane!
E mësoni sonte, në 20:45, emrin e finalistit të parë të Champions League-s së këtij sezoni! /tesheshi.com/
