Edhe pse kanë kaluar ditë nga përkujtimi i 100-vjetorit të incidenteve të 1915-s dhe nga përplasjet verbale mes zyrtarëve turq dhe atyre europianë e më gjerë për përkufizimin e tyre, vijojnë ende deklaratat.
Në një prej tyre, dijetari i spikatur musliman, Jusuf Kardavi, ka shprehur mbështetjen për Turqinë ndaj “pretendimeve dashakeqe” për ngjarjet e 1915-s.
“Ka një fushatë keqdashëse në rritje nga disa vende për t’i bërë presion Turqisë që të marrë përgjegjësinë për gjenocidin e supozuar armen në vitin 1915,” u shpreh Kardavi në një deklaratë të bërë ditën e djeshme.
“Përpjekjet për ta shtrembëruar historinë, duke e rritur numrin e armenëve të vrarë në incidentet e 1915-s dhe duke i minimizuar viktimat otomane, nuk do t’i bëjnë mbështetësit e Turqisë të jepen përpara këtyre fushatave,” vazhdoi më tutje drejtuesi i Unionit Ndërkombëtar të Dijetarëve Muslimanë.
“Historia nuk i ka harruar viktimat e kryqëzatave, në të cilat ushtritë europiane kryen vrasjet më brutale në Jerusalem dhe në Levant,” qenë fjalët e dijetarit.
Turqia, e mësuar tashmë me retorikën që përsëritet për çdo vit në muajin prill, nuk e pranon assesi përdorimin e termit “gjenocid”, dhe është treguar e gatshme t’i hapë arkivat e kohës për një studim më të mirëfilltë të atyre ngjarjeve. /tesheshi.com/
