Kryeministri kanadez do të shkruante në Twitter jo shumë kohë më parë, pak pasi Trump kishte nënshkruar urdhrin ekzekutiv që u mbyllte dyert e SHBA-së refugjatëve dhe qytetarëve nga një numër vendesh muslimane: “Për ata që i ikin persekutimit, terrorit dhe luftës, Kanadaja do t’ju mirëpresë, pavarësisht besimit tuaj.”
Por shumë më i tërhequr do të tregohej Justin Trudeau në konferencën e përbashkët për shtyp me presidentin Trump në Uashington.
Në përpjekje për të shmangur çdo incident të mundshëm, Trudeau deklaroi në konferencën e shtypit se nuk i takonte atij t’i jepte leksione SHBA-së.
“Gjëja e fundit që kanadezët presin nga unë është t’i jap leksion një vendi tjetër se si të zgjedhë të qeveriset.”
Përndryshe, siç do të shprehej ai, “Roli im, përgjegjësia ime, është të vazhdoj të qeveris në një mënyrë të tillë që reflekton qasjen e kanadezëve dhe është një shembull pozitiv në botë.” /tesheshi.com/
