Ndërsa në një cep të globit, dikush kërcënon me shfarosje – Kim Jong Un me armët e tij bërthamore – në një tjetër cep, një lider bëhet i dashur për popullin e vet pasi përçon paqe për njerëzit ngado, në gjuhë e veprime.
Dhe nuk është udhëheqës i parëndësishëm. Është në krye të një vendi të madh e të begatë, ku shumëkush do donte të jetonte aty, Kanadasë.
Ky është Justin Trudeau, i cili vitet e fundit është njohur për zemërgjerësinë e tij dhe krahapjen ndaj valës së refugjatëve të ikur nga vatrat e nxehta të luftës në Lindje.
Por më shumë se virtyte individuale, ai shpalos dhe një politikë anti-ksenofobe të instaluar në frymën e qeverisjes së tij. Dhe ndodh kjo, duke qenë fqinj me një tjetër lider problematik në këtë pikë, Donald Trump.
Sot, kur modeli i liderit është ai të përlyerit me skandale, por dhe të frikshëm, jo vetëm ushtarakisht por dhe amoralisht, Justin Trudeau përbën një model të të qeverisurit me sportivitet, në kuptimin e të qasurit të realiteteve me dashuri.
Kjo nuk do të thotë se dhe vendi i tij nuk ka probleme, nuk ka sfida. Por do të thotë se forma e zgjedhur për t’i zgjidhur ato, është përcaktuese, për suksesin apo dështimin. /tesheshi.com/
