Për herë të parë që nga e hëna kur presidenti Meta ç’dekretoi zgjedhjet, një precedent i panjohur deri më sot në asnjë praktikë demokratike, nxorri juristin e tij për t’u shpjeguar.
Por Bledar Dervishaj, njeriu që duhej ta zbërthente aktin i cili ka futur në kaos dhe më të rëndë politikën, u mjaftua me fjali të përgjithshme, duke thënë se“Presidenti thekson para shqiptarëve dhe partnerëve se dekreti për shfuqizimin u mor në mbështetje me dispozitat Kushtetuese. Ky akt është marrë bazuar te argumentet Kushtetuese. Ai është në fuqi dhe i detyrueshëm për zbatim nga të gjithë.
KQZ është e detyruar ta zbatojë, çdo vendim tjetër është i patolerueshëm nga ligji. Cdo parti që e kundërshton është e lirë të ngrejë pretendimet në gjykatën Kushtetuese apo tjetër që vlerëson se mund të zgjidhë cështjen“.
Në këtë rast, siç mund të shihet, nuk ka asnjë referencë kushtetuese të artikuluar apo zbërthyer.
Ndërkohë, juristi në fjalë e quan aktin si “të veçantë”, pa e përkthyer juridikisht se çdo të thotë në terma të korrektësisë kushtetuese.
“Akti për anulimin e zgjedhjeve është i veçantë në lloj e vet“. tha Dervishaj.
Por ky jurist, e ka komentuar në këtë mënyrë atë që përbën një tjetër problem nga shtyrja e datës së zgjedhjeve, e që është përfundimi i mandatit kushtetues të të zgjedhurve lokalë.
“Kryetarët aktualë të Bashkive do të qëndrojnë në detyrë derisa sa të zgjidhen kryetarët e rinj”, tha ai.
Reagoi Rama nga Përrenjasi, duke thënë: “Më tha Taulanti që Presidenti kishte nxjerrë ca ekspertë që paskan thënë që ai po rishikon mundësinë e një date tjetër dhe deri atëherë kryetarët e bashkive do të rrinë në zyrë. Një tjetër pjellë e një imagjinate të dalë nga kontrolli për të çuar vijën e konfliktit matanë 30 Qershorit, që është vulosur dhe nuk e ndalon dot, as Ilir, as Saliu dhe as artisti me fallxhoren“. /tesheshi.com/
