Presidenti i Komisionit Evropian, Jean-Claude Juncker është zyrtari i radhës i huaj që i bën thirrje Prishtinës zyrtare ta ratifikojë Demarkacionin me Malin e Zi, në mënyrë siç thotë ai t’i hapet rrugë liberalizimit të vizave.
“Është esenciale që Kuvendi të votojë së shpejti Demarkacionin, një hap kyç i pashmangshëm, i rëndësishëm drejt libeeralizimit te vizave ku bashkëqytetarët tuaj do jenë përfituesit e parë. Po ashtu, të gjitha përpjekjet në luftën kundër krimit e korrupsionit duhet të luftohen më tej. Nuk më kënaq ideja që kosovarët janë të vetmit që nuk mund të udhëtojnë lirshëm dhe duhet të kenë të drejta si qytetarët e shteteve tjera, por me kusht që Demarkacioni të zgjidhet dhe të bëhen hapa konkretë në luftën kundër korrupsionit”, tha Juncker në konferencën e përbashkët për media me presidentin Thaçi.
I pyetur se a ka një datë se kur mund të hiqen vizat për kosovarët pasi të votohet Demarkacioni, Juncker nuk ka qenë në gjendje ta japë një të tillë.
“Nuk varet nga ne t’i themi Kosovës kur dhe si. Nuk kam ardhur këtu që të ligjëroj për demokraci. Jemi të lumtur për përpjekjet e bëra. Nuk do të japë datë. Data do të jetë rrjedhojë se veprimit që do të bëni në çështjen e demarkacionit”, tha Juncker.
Kurse presidenti Thaçi tha se prezenca e krerëve të BE-së në Prishtinë është një dëshmi e përkushtimit të rritur të Brukselit për Kosovën dhe te gjitha shtetet e Ballkanit Perëndimor.
Kurse sa i përket (mos)ratifikimit të Demarkacionit, Thaçi tha se kjo do të ndodhë ditët e ardhshme pa caktuar se kur.
“Demarkacioni do ratifikohet ditët e ardhshme dhe BE do t’i japë fund izolimit të Kosovës”, tha Thaçi.
Lidhur me perspektivën evropiane, shtoi Thaçi se ja bëri të qartë Junckerit se Kosova nuk kërkon rrugë të shkurtër por pret trajtim të barabartë dhe qartësim në rrugën përpara. /tesheshi.com/
