Komisioni i BE-së asnjëherë nuk ka kërkuar masa të tjera shtrënguese për Greqinë. Brukseli është përgjigjur menjëherë nëpërmjet Juncker, kundrejt fjalëve të thëna nga Tsipras në Athinë.
“Nuk kam kontakte me qeverinë greke që nga e diela në mbrëmje”,- ka thënë Juncker gjatë një konference për shtyp që ndoqi takimin e tij me Sekretarin e Përgjithshëm të NATO-s, Stoltenberg.
“Kam vendosur të ndaloj negociatat sepse, sepse, duke mbajtur parasysh pozicionin e Athinës, kemi mbërritur në një pikë të vdekur. Nuk jam aktualisht në favor, dhe Tsipras e di mirë, të rritjes së TVSH-së tek ilaçet apo tek energjia elektrike, ashtu siç mendoj se është gabim të shtyjmë Greqinë drejt aplikimit të këtyre masave”,- ka thënë Juncker.
Ai ka shtuar më pas se beson që debati si brenda edhe jashtë kufirit grek, do të ishte më i thjeshtë nëse Athina do të deklaronte se cilat janë propozimet e vërteta të Komisionit Europian, një prej tre institucioneve të përfshira në negociata.
“Po fajësoj qeverinë e Tsipras se nuk po i tregon publikut për atë që ne kemi biseduar”,- ishin fjalët e Juncker.
Qëndrimi i tij lë të kuptojmë se koha e buzëqeshjeve dhe shtrëngimit të duarve ka marrë fund. Me shumë mundësi, në këtë pikë që është arritur, rriten shpresat që Eurogrupi të arrijë në një marrëveshje këtë të premte, në mënyrë që të ndihmojë Greqinë me borxhin dhe krizën. /tesheshi.com/
