Mark Julano prezantohet si trajner i ri i Partizanit të Tiranës. Italiani ka mbërritur në kryeqytetin e Shqipërisë dhe ka deklaruar për mediat se ka vetëm një objektiv, atë të fitimit të titullit me të kuqtë.
Ndërsa presidenti i Partizanit Gazmend Demi, konfirmoi se Juliano është prurje e Luciano Moxhit.
“Partizani s’ka arritur të marrë akoma një trofe, pavarësisht se kemi qenë në garë deri në momentet e fundit. Moxhi na solli një djalosh simpatik në pamje, por që flitet që është edhe një trajner i mirë. Shpresoj që këtë vit të fitojmë titullin kampion dhe të ecim sa më larg në Kupat e Europës. Juliano e ka marrë seriozisht punën për ta ndihmuar skuadrën. Ne të gjithë jemi serioz për ecurinë e Partizanit”- është shprehur presidenti Demi në konferencën për shtyp, duke bërë edhe batutë për rolin e Starovës në klub: “Starova do të jetë në stafin e Partizanit.
Juliano ka energji më të madhe se Starova, si dhe pamjen e ka me simpatike”. Ndërsa trajneri Juliano në fjalën e tij, u shpreh se ndihej krenar që ishte zgjedhje e Moxhit: “Krenar edhe që bëhem italiani i katërt që drejton Partizanin. I kam ndjekur ndeshjet e sezonit të shkuar dhe i njoh mirë të gjithë lojtarët”- deklaroi Juliano.
“Duke studiuar këtë kampionat, futbollistët shqiptarë, rezulton se nuk është vetëm futbolli fizik që mendohej, por ka lojtarë të jashtëzakonshëm nga pikëpamja teknike. Atyre as unë, as Panuçi, as trajnerë të tjerë nuk duhet t’u mësojmë asgjë teknikisht, por duhen drejtuar nga disiplina taktike. Kam parë shumë ndeshje ku shumë lojtarë nuk shkonin në të njëjtin drejtim, ose taktikisht nuk punonin si skuadër.
Unë dhe stafi im duhet të bëjmë gjërat për Partizanin, jemi këtu për të përmirësuar ku mund të rriten lojtarët shqiptarë. Nuk kemi ardhur të ndryshojmë Shqipërinë, në disa gjëra na e keni mësuar ju ne çfarë të bëjmë. Por ka disa karakteristika futbollistësh a trajnerësh që të bashkuara me teknikën dhe eksperiencën mund të krijojnë diçka të rëndëishme. Ajo që kërkon presidenti, i cili është lodhur duke mos fituar”- ka qenë një pjesë e fjalës së trajnerit të ri të Partizanit, i cili “do të sjellë”, përvec zëvendësit të tij Dosena edhe 3 lojtarë italianë për të luajtur me uniformën e kuqe. /tesheshi.com/
