Julian Sinanaj, atentatori tritolvënës, ka nisur të tërhiqet duke mohuar ato që vetë ka pohuar dy vjet më parë mbi krimet e kryera në vite si vrasës me pagesë.
Në një seancë më dyer të mbyllura, Sinanaj i tha trupit gjykues se nuk është ai njeriu që ka organizuar shpërthimin në banesën e deputetit Ardian Kollozi; se nuk ka marrë pjesë në vrasjen e biznesmenit Agron Çela; dhe se nuk ka qenë fare i përfshirë me shtetasin Marion Mitro për të kryer një shpërthim në automjetin e ish-prefektit Besnik Dervishaj.
“I pranova këto tre ngjarje për shkak se policia më detyroi, por nuk kam fare dijeni se kush është autori i tyre”, ka deklaruar Sinanaj.
Por prokuroria këmbëngul se Sinanaj, sipas deklaratës së tij të dhënë në polici, është paguar 20 mijë euro nga Marjon Mitro për të instaluar bombën me telekomandë në automjetin e ish-prefektit të Vlorës, Dervishaj; 35 mijë euro për vrasjen e Agron Çelës nga kushërinjtë Mëhillaj dhe 150 mijë euro për vrasjen e biznesmenit Pirro Bare.
Në fillim të seancave, Julian Sinanaj nisi të fliste për të gjithë veprat e tij, por kohë pas kohe nisi t’i përgënjeshtronte ato që thoshte, me pretendimin se po i bëhej presion nga policia. /tesheshi.com/
