Struga e cila duhet të ishte një perlë buzë liqenit, ngjashëm si Ohri, është përfshirë së fundi nga paniku i djegies së plehrave, një kërcënim serioz për shëndetin e banorëve, por dhe prestigjin e këtij qyteti në prag të sezonit turistik.
Flakët e përmasave të mëdha janë parë si një fatkeqësi mjedisore për Strugën. Qytetarë të saj kanë paralajmëruar daljen në protesta nëse nuk gjendet një zgjidhje nga shteti.
Marrja flakë e plehrave në sheshgrumbullimin e tyre, ndodh një ditë pas vizitës së ministrit të Mjedisit Sadulla Duraku, i cili tha se qeveria ka ngritur grup pune për këtë problem.
“Me sugjerimet e grupeve punuese, ne si qeveri marrim hapa të shpejta që këtë problematikë dhe shuarjen e zjarrit ta bëjmë në këtë deponi”, tha Duraku.
Ndërsa kryetari i Strugës, Mustafa Zabzuni tha se zgjidhjen e këtij problemi e sheh nëpërmjet të disa fazave.
“Faza e parë e zgjidhjes së problemit është që ta shuajmë zjarrin; e dyta është që gjendet zgjidhje afatshkurtër e cila është transferimi i deponisë së Strugës në rrethinë për të qenë më pak e dëmshme për natyrën dhe qytetarët që më pas të mund të sigurohet një deponi rajonale për deponitë e Maqedonisë”, u shpreh Zabzuni.
Për problemin e vjetër të deponisë së Strugës reaguan edhe deputetët.
Madje opozita kërkoj seancë të veçantë për gjendjen në Strugë, meqë sipas Ilija Dimovskit disa nga deputetët e shumicës janë ish-kryetarë të Strugës, dhe faji është i tyre.
“Kjo situatë me Strugën është momenti i parë që Kuvendi duhet dhe mund të lë pas punët tjera. Unë nuk fola që ministri i Mjedisit jetësor qe një javë nuk ka qenë në Strugë dhe për ministrat tjerë të Strugës që nuk janë angazhuar, dhe nuk kam thënë se pjesë përbërëse e qeverisë dhe as kryetarë komune të Strugës nuk kanë ndërmarrë asgjë”, tha Ilija Dimovski, deputet i VMRO-DPMNE.
Deputeti Jovan Mitreski i LSDM-së ia kujtoi opozitës se problemi i vjetër u shkaktua nga qeveria e vjetër.
“Mirë që tash opozita e kujtoi pas 10 vjet se ka problem. Pajtohem me Dimovskin se Struga është në gjendje të tmerrshme! Por, kujtojmë se kjo nuk është prej sot! Por, ky problem është tash e 10 vjet dhe për atë kemi sjellë shumë amendamente për zgjidhjen e këtij problemi”, tha Jovan Mitreski, deputet i LSDM.
Lëvizja BESA reagon për deponinë në Strugë, duke theksuar se ajo po paraqitet si përsëritje e fenomenit të Jugohromit, e cila bën helmimin e qytetarëve në mënyrë të heshtur duke marrë përmasa serioze në drejtim të dëmtimit të shëndetit të qytetarëve e sidomos të fëmijëve.
“Natyra qytetit të Strugës i ka falë një bukuri natyrore që e karakterizon për natyrë të pastër për të cilën ia kanë zili shumë vende evropiane. Situata që ka marrë përmasa katastrofale jo vetëm që e zhbën këtë element si pasuri e qytetit të Strugës por njëherit fshehë edhe prapaskena të errëta të politikës ditore që shkojnë në dëm të qyetarëve”, thekson BESA. /tesheshi.com/
