Mançester Junajtedi nuk ka fituar trofe që prej largimit të legjendarit Alex Ferguson tre vite të shkuara, për të përfunduar këtë sezon në vend të pestë në Premier League. Një pozitë që u heq mundësinë “djajve të kuq” të luajnë muaj më pas në Champions League.
Por spanjolli Juan Mata, i cili luan për Mançesterin prej dy sezonesh, është shpresëplotë se ekipi i tij ka për të nisur ngritjen e trofeve brenda dymbëdhjetë muajve, e kjo falë mentalitetit fitues.
“Ky klub do të luftojë për tituj,” është shprehur Mata për BBC-në.
Mata mendon se fitorja është pjesë e pandashme e mentalitetit të klubit.
“Jam i sigurt se ky klub do të luftojë përsëri për trofe.”
Spanjolli ka përmendur mes gjërave pozitive të këtij sezoni për Mançester Junajtedin spikatjen e dy futbollistëve të rinj, Marcus Rashford-it dhe Anthony Martial-it. “Ata janë të dy lojtarë emocionues,” do të qe përshkrimi i Juan Mata-s.
Megjithatë, pavarësisht parashikimeve afatmesme të spanjollit, Mançester Junajtedi ka mundësinë ta fitojë një trofe që këtë fundjavë. Të shtunën do të luhet në “Wembley” finalja e FA Cup-it, e cila vë përballë Kristëll Pallasin me Mançester Junajtedin.
Fitimi ose jo i këtij trofeu do të ndikojë dhe në të ardhmen e trajnerit Van Gaal, që akoma nuk dihet në do qëndrojë apo do largohet. /tesheshi.com/
