Lideri i liberaldemokratëve të Serbisë, Çedomir Jovanoviq, ka lëshuar një alarm të fortë duke akuzuar elitën e Beogradit, se po vazhdon ta çojë popullin serb drejt depresionit, si pasojë e ushqimit me politika urrejtjeje dhe reabilitim të kriminelëve të luftës.
Në një deklaratë që e bën të ditur gazeta prestigjoze “Danas”, Jovanoviq tha se “si rezultat i flirtit të vazhdueshëm të çdo qeverie me politikën e luftës dhe nacionalizmit, vendi është në degradim shpirtëror.
Keqleximi i historisë dhe rehabilitimi i kriminelëve dhe politikave kriminale janë rrënjët e thella të fundosjes sonë sociale, morale dhe intelektuale”.
Sipas tij, problem është se politika e viteve 90, pra njerëzve të Millosheviqit po zbatohet në mënyrë të plotë në qeverisjen serbe, çka ka sjellë një gjendje të rëndë.
“Paqja dhe stabiliteti i Serbisë mund të vijë vetëm me integrimin në BE, por edhe me vendet e rajonit duke promovuar mirëkuptim dhe bashkëpunim.
Këto objektiva do të arrihen vetëm nëpërmjet një ndryshimi në vlerat e qeverisjes dhe distancimin nga politikat që shkatërruan vendin dhe rajonin”, theksoi Jovanoviq.
Politikani opozitar që është plagosur për fjalët e tij kurajoze më shumë se dy here, tha se “glorifikimi i pakuptimtë i Millosheviqit dhe mbrojtja e krimeve të tij, mund të jetë zgjedhja e duhur politike pragmatiste për të marrë vota, por shumica e njerëzve të cilët përbëjnë një shoqëri normale evropiane kërkojnë një qeveri që do të çojë Serbinë drejt Europës. Dhe të tillë ne nuk e kemi”.
Marrë nga Danas- /tesheshi.com/
