Agjencia shtetërore jordaneze e lajmeve, Petra, ka lajmëruar sot se ambasadori jordanez në Iran është thirrur në vendin e tij për konsultime.
Sipas ministrit të Shtetit për Çështjet e Medias, e njëkohësisht zëdhënësit të qeverisë, Muhammed Momani, ky hap i Jordanisë është për shkak të ndërhyrjes iraniane në punët e brendshme të vendeve arabe fqinje, posaçërisht në ato të Gjirit.
Deklarata përmend dhe shkeljen e parimeve të fqinjësisë së mirë, diçka që Jordania e kërkon në marrëdhëniet me vendet fqinje të botës arabe.
“Qëndrime të tilla të papranueshme,” thotë deklarata, “krijojnë kriza dhe thellojnë paqëndrueshmërinë në rajonin tonë.”
Kështu Jordania bëhet vendi i fundit arab që reagon diplomatikisht ndaj qëndrimeve iraniane në rajon, duke patur si referencë përplasjen e pak kohëve përpara mes Iranit dhe Arabisë Saudite.
“Jordania ka theksuar se sulmet mbi konsullatën dhe amabasadën saudite përbëjnë një shkelje flagrante të konventave ndërkombëtare,” shpjegoi zëdhënësi i qeverisë.
Një pjesë e mediave e lidhin tërheqjen e ambasadorit dhe me dështimin e takimit dje në Doha për të arritur një marrëveshje për reduktimin e prodhimit të naftës.
Irani, që nuk dërgoi përfaqësues në takimin e vendeve të OPEC-ut, e ka bërë të qartë se nuk do ta kufizojë prodhimin gjersa niveli i eksportit të naftës të arrijë atë të para sanksioneve.
Prodhimi ditor i naftës në Iran është rritur tashmë me rreth 400.000 fuçi që prej heqjes së sankisoneve ndërkombëtare, duke patur goxha ndikim në uljen e çmimeve. /tesheshi.com/
