Mesfushori argjentinas 32-vjeçar e ka paditur ish-klubin e tij anglez, Njukasëllin, për sjellje diskriminuese, dhe kërkon dëmshpërblim financiar.
Gutierrez luan sot në kampionatin spanjoll, me Deportivon, por duke iu kthyer të shkuarës së tij të afërt, pretendon se për shkak të kancerit, sëmundjes për të cilën u mjekua dhe u shërua, te Njukasëlli e lanë jashtë formacionit për të mos ia zgjatur kontratën.
Sipas Gutierrez-it, një klauzolë në kontratën e tij parashikonte që nëse ai luante 80 ndeshje në formacionin e parë mes viteve 2011-2015, kontrata do të zgjatej automatikisht me një vit, ndërsa ai bëri vetëm 78 paraqitje të tilla.
Gutierrez iu bashkua Njukasëllit në 2008-ën, e në tetor të 2013-ës u operua për heqjen e një tumori. Ndërsa ishte drejt shërimit të plotë dhe kthimit në gjendjen e duhur fizike për të luajtur, argjentinasi tregon se ish-trajneri i tij, Alan Pardew, e kishte informuar në dhjetor të atij viti se ai nuk më i nevojshëm më për klubin.
Me 19 muaj ende në kontratë asokohe, ish-lojtari i kombëtares argjentinase thotë se u la jashtë ekipit për arsye të kancerit. “E ndjeva se isha lënë jashtë ekipit të parë për shkak të kancerit, çka ishte shumë pikëlluese. Klubi duhej të më kishte mbështetur dhe të më lejonte të stëvitesha me shokët e ekipit.” Ai do të stërvitej për muaj të tërë me rezervat e Njukasëllit, ndërsa më herët kishte qenë një prej lojtarëve thelbësorë të formacionit të parë.
Mediat britanike bëjnë me dije se Gutierrez kërkon një kompensim financiar prej dy milionë paundësh. /tesheshi.com/
