Qeveria britanike është akuzuar se nuk e ka marrë seriozisht valën e të nxehtit që pritet të godasë Mbretërinë e Bashkuar, pasi sinoptikanët paralajmërojnë se temperaturat ekstreme mund të çojnë në vdekjen e njerëzve.
Kryeministri në largim Boris Johnson humbi takimin e ekipit të krizës në Downing Street të shtunën, ndërsa ishte i zënë duke u përshëndetur me miq në Checkers, në veriperëndim të Londrës. Sot, zëvendëskryeministri Dominic Raab duket se ishte “i gëzuar” me parashikimin se temperaturat mund të arrijnë 40 gradë Celsius për herë të parë në histori në Angli. “Sigurisht, ne dëgjojmë këshillat e arsyeshme: qëndroni të hidratuar, shmangni diellin gjatë pjesës më të nxehtë të ditës dhe vendosni krem kundër diellit, diçka e tillë,” tha ai për Sky News, duke shtuar: “Por ne duhet të përfitojmë nga dielli”, duke siguruar se vendi mund të përballojë vapën dhe nuk ka asnjë arsye për mbylljen e shkollave.
Komentet zemëruan profesionistët e shëndetësisë dhe meteorologët.
“Nuk është një ditë e bukur dhe me diell ku do të vendosim krem kundër diellit, do të dalim dhe do të notojmë ose do të hamë. Kjo është një valë e fortë të nxehti që në fund mund të vrasë njerëz sepse do të jetë kaq intensive. Ne nuk jemi të përgatitur për këtë lloj nxehtësie në këtë vend”, paralajmëroi Tracey Nicholls, kreu i Kolegjit të Profesioneve Paramedik.
Sekretari i Transportit Keith Malthouse bëri thirrje që të mos ketë “probleme serioze” në transport ndërsa kryebashkiaku i Londrës Sadiq Khan këshilloi njerëzit të përdorin transportin publik vetëm nëse “absolutisht e nevojshme”.
Met Office ka lëshuar “alarmin e kuq” të parë për nxehtësinë ekstreme të hënën dhe të martën. Temperatura në Londër mund të kalojë 40 gradë. Rekordi absolut i Mbretërisë së Bashkuar u shënua në 25 korrik 2019 dhe ishte 38.7 gradë i regjistruar në Kopshtin Botanik të Kembrixhit.
Shërbimet e transportit të pacientëve janë vënë në alarm dhe shumë shkolla tashmë kanë njoftuar se do të qëndrojnë të mbyllura. /tesheshi.com/
