Mëngjesin e 6 gushtit 1945, bombarduesi amerikan B-29 lëshoi një bombë uraniumi mbi Hiroshima, duke lënë të vdekur aty për aty 70.000 persona, një numër që vajti më pas në 140.000 viktima.
Shtatë dekada e kusur më pas, një sekretar amerikan Shteti në detyrë viziton për herë të parë memorialin e Hiroshimës në kujtim të viktimave.
Në kuadër të një takimi të ministrave të Jashtëm të G7-ës që zhvillohet në Hiroshima, John Kerry, i bashkëshoqëruar nga homologët e tij, kanë vizituar memorialin e Hiroshimës, si dhe muzeun e Hiroshimës, ku përshkruhet e tërë drama e bombardimit bërthamor.
Diplomatët vendosën fillimisht kurora në Parkun e Memorialit të Paqes, për të vizituar dhe të vetmen ndërtesë të lënë pranë vendit ku ra bomba bërthamore.
Megjithatë, siç lajmëron CNN-i, një zyrtar i lartë i Departamentit të Shtetit që ka udhëtuar me John Kerry-n e ka bërë të qartë se sekretari amerikan i Shtetit nuk do të kërkojë ndjesë për atë çfarë ngjau atëbotë.
“Po qe se pyesni nëse sekretari i Shtetit erdhi në Hiroshima për të kërkuar ndjesë, përgjigjja është jo!”
Ndërsa SHBA-të dhe Japonia po përpiqen t’i forcojnë akoma më tepër marrëdhëniet dypalëshe, Kerry ka deklaruar se vizita e tij qe “për të tashmen dhe të ardhmen”.
Një takim i udhëheqësve të G7-ës në maj do ta sjellë presidentin Obama në Japoni, e raportime të ndryshme flasin se ai po e merr në konsideratë një vizitë në Hiroshima. Nëse kjo do të ngjasë, do të qe vizita e parë e një presidenti amerikan në detyrë në atë vend. /tesheshi.com/
