Sekretari amerikan i Shtetit ka për t’u takuar të hënën në Bruksel me shefen e politikës së jashtme të BE-së, Federica Mogherini, dhe me homologun britanik, Philip Hammond, në Londër.
Zyrtari i lartë i Departamentit të Shtetit që e bëri njoftimin vuri në dukje se John Kerry do ta vërë theksin te rëndësia e faktit që anëtarë të tjerë të BE-së të mos ndjekin shembullin e Britanisë e ta dobësojnë më tej unionin.
Ndërkohë, sekretari amerikan i Shtetit tha sot se Shtetet e Bashkuara të Amerikës, Bashkimi Europian dhe Britania duhet të bashkëpunojnë pavarësisht vendimit të Mbretërisë së Bashkuar për të dalë nga BE-ja.
Kerry përsëriti se vendi i tij do të vazhdojë të ruajë një marrëdhënie shumë të ngushtë dhe të veçantë me Britaninë e Madhe.
Presidenti Obama i pati nxitur më herët votuesit në Britani që të mos e japin votën për Brexit-in. Shqetësimi amerikan është se vende të tjera mund të duan ta ndjekin Britaninë në daljen nga BE-ja, siç edhe janë dhënë sinjalet e para përmes kërkesave për referendume të ngjashme. /tesheshi.com/
