John Kerry, sekretari amerikan i shtetit, tregoi se si kishte dështuar një zgjidhje për të kufizuar bombardimet ruse në Halep, për shkak të ndarjeve brenda radhëve politike të vendit të tij.
Në një intervistë të gjerë për Boston Globe, Kerry tha se ai kishte punuar shumë në një marrëveshje, pērmes së cilës Rusia dhe SHBA-të do të ndanin “operacionet e përbashkëta ushtarake” në Siri.
Ky propozim u kritikua në atë kohë si një iniciativë nga ana e SHBA-ve se po tenton të lidhet me aleatin e Asadit, të cilin Shtëpia e Bardhë e ka deklaruar kriminel lufte. Por Kerry tha se marrëveshja përfshinte fuqinë e një “vetoje” nga ana e SHBA-ve, lidhur me atë se ku dhe çfarë mund të bombardonin rusët.
“Për fat të keq kemi pasur ndarje brenda vetë radhëve tona, që e bëri zbatimin e saj jashtëzakonisht të vështirë për të përmbushur”, tha Kerry.
Thuhet se negociatat u shpërbënë kur ai u përplas me Ash Carter, sekretarin e mbrojtjes të SHBA-së.
“Tashmë është vonë padyshim, për shkak të gjithë asaj çfarë ka ndodhur në Halep”, tha Kerry, por shtoi se ai beson se do të kishte qenë një situatë ndryshme në qytet, po të kishte funksionuar plani i tij.
Forcat siriane dhe ruse kanë bombarduar pa dallim qytetin, kanë rrafshuar ndërtesa të larta në të cilat banonin civilë. Ndërkohë që qyteti, tani në rrënoja, ka rënë në duart e qeversë. Ka raportime të masakrimit të grave dhe fëmijëve ndërsa ata po përpiqen të ikin.
Ai tha se “rusët dhe Asadi në thelb janë duke hedhur të gjithë në të njëjtën tenxhere, si dhe janë duke vepruar jashtë çdo standardi të përmbajtur të luftës”.
Ai tha se ata janë duke “sfiduar të gjitha normat e pritshme të sjelljes humanitare”.
Tashmë, Kerry po përgatitet të largohet nga posti i Sekretarit të Shtetit, pas 34 vjetësh në detyra publike. /tesheshi.com/
