Në një fjalë të mbajtur në Kombet e Bashkuara, sekretari amerikan i Shtetit ka thënë se e ardhmja e Sirisë është në fije të perit, e se duhet ndaluar fluturimi i avionëve në zonat kyçe të vendit për ta shpëtuar armëpushimin.
John Kerry, duke iu referuar sulmit të së hënës, ku u vranë 20 civilë, ka shprehur dyshimin nëse Rusia dhe qeveria siriane do t’u përmbahen kushteve të marrëveshjes së armëpushimit.
BBC-ja raporton se Kerry ka kërkuar ndalimin e fluturimeve për të mos u përshkallëzuar situata dhe për t’u dhënë mundësi ndihmave humanitare të shkojnë në vendmbërritje të papenguara.
Shefi i diplomacisë amerikane do të thoshte se, “Sulmi u ka dhënë një goditje të rëndë përpjekjeve tona për të sjellë paqe në Siri.”
Një sulm tjetër natën e kësaj të marte la të vdekur pesë persona, të angazhuar për një agjenci ndërkombëtare ndihmash.
Armëpushimi në Siri zgjati vetëm një javë, dhe me mbarimin e tij situata është përkeqësuar menjëherë. Bombardimi i një autokolone me ndihma është incidenti më i rëndë gjatë këtyre ditëve. /tesheshi.com/
