Ish-Këshilltari i Sigurisë Kombëtare të Presidentit Donald Trump, John Bolton, njoftoi se liderët e Serbisë dhe Kosovës diskutuan për shkëmbimin e territoreve në vitin 2018.
Në një bisedë me Shoqatën e Gazetarëve të Huaj, Bolton tha se, megjithëse ideja e udhëheqësve të të dy vendeve ishte e diskutueshme, ai mendoi se ia vlen të merrej në konsideratë.
“Në rastin e Kosovës dhe Serbisë, në vitin 2018 tashmë kishte indikacione se liderët donin t’i zgjidhnin këto çështje, sepse ata panë që ata nuk mund të kishin rritje të besueshme ekonomike dhe stabilitet derisa marrëdhëniet e tyre të normalizoheshin. Ishte shumë e diskutueshme në të dy vendet, por dukej se ia vlente përpjekja. Një nga gjërat që diskutuan ishte mundësia e shkëmbimit të territoreve. Në disa pjesë të Ballkanit, Gjermanisë dhe Evropës Perëndimore, kjo është pritur me shqetësime, nga frika se ky këmbim mund të përbënte një precedent për diku tjetër. Por ndodh në histori dhe është diçka me të cilën duhet të jetosh”.
I dërguari i posaçëm i Presidentit Trump për dialogun Kosovë-Serbi, Richard Grennell, tha së fundmi se ideja e një shkëmbimi territoresh nuk u mbështet nga Presidenti Trump por nga John Bolton.
Deklarata e Grennell kundërshton pretendimet e tij të mëparshme se ai kurrë nuk ishte në dijeni se kishte plane për të shkëmbyer tokë midis Kosovës dhe Serbisë.
Pas deklaratave të fundit të John Bolton dhe Richard Grennell, i cili u emërua si një i dërguar special në vitin 2019, mund të konkludohet se administrata Trump në një kohë e konsideronte opsionin e shkëmbimit të territoreve, por se ai nuk është më në qarkullim. /tesheshi.com/
