Joe Biden: Ngjarje si kjo do të ndryshonin botën

Sulmi i Rusisë ndaj Ukrainës mund të bëhet “pushtimi më i madh” që nga Lufta e Dytë Botërore, duke pasur parasysh praninë e madhe të trupave pranë kufirit, beson presidenti amerikan Joe Biden.

“Një ngjarje e tillë do të ndryshonte botën,” u tha Biden gazetarëve.

Ai paralajmëroi se presidenti rus Vladimir Putin vazhdon të vendosë forca përgjatë kufirit ukrainas nga Bjellorusia.

I pyetur nëse ai mund ta shihte veten duke sanksionuar Putinin në rast të një pushtimi, Biden u përgjigj: “Po, do ta shihja”.

Presidenti amerikan theksoi se nuk do të ketë forca amerikane në Ukrainë.

Më herët të martën, një zyrtar i lartë i qeverisë amerikane tha se Uashingtoni dhe aleatët e tij po përgatiteshin për një reduktim të mundshëm të furnizimeve me gaz rus në Evropë në rast të një përshkallëzimi në Ukrainë.

“Ne po punojmë me vende dhe kompani në mbarë botën për të garantuar sigurinë e furnizimit dhe për të zbutur goditjet e çmimeve që prekin si popullin amerikan ashtu edhe ekonominë globale. Aktualisht jemi në bisedime me prodhuesit kryesorë të gazit natyror në mbarë botën për të kuptuar kapacitetin dhe vullnetin e tyre për të rritur përkohësisht prodhimin e gazit natyror dhe për t’i alokuar ato sasi për klientët evropianë”, tha zyrtari.

Ai gjithashtu theksoi se gazi ka disa javë që ruhet në magazina në Evropë.

Përpjekjet u fokusuan në sigurimin e një zëvendësimi brenda ditëve ose javëve, jo muajve, në rast të një reduktimi ose humbjeje të furnizimeve ruse.

Shtetet e Bashkuara dyshojnë se Rusia po përpiqet të përdorë energjinë si armë.

Kremlini, nga ana tjetër, ka përjashtuar mundësinë që Rusia të mbyllë rubinetin e gazit në rast të sanksioneve. /tesheshi.com/