Jo vetëm Trump-i, anketimi tregon se dhe europianët janë kundër emigrimit të muslimanëve

Një anketim i kryer nga një institut me qendër në Londër, Chatham House, ka treguar se kundërshtia publike ndaj emigracionit nga vendet me shumicë muslimane nuk është e kufizuar me elektoratin e Trump-it në SHBA, por është e përhapur gjerësisht dhe në Europë.

I kryer para daljes së urdhrit ekzekutiv të Trump-it, anketimi ka patur një thënie për të cilën të anketuarit duhet të jepnin vlerësimin e tyre, “I gjithë emigrimi i mëtejshëm nga vendet përgjithësisht muslimane duhet ndaluar.”

Me pjesëmarrjen e 10.000 personave nga dhjetë shtete europiane, anketimi ka treguar se 55 për qind e tyre ishin kundër emigrimit të muslimanëve, e se pajtoheshin me thënien e mësipërme. 25 për qind e tyre kanë patur një qëndrim asnjanës, e 20 për qind kanë qenë kundër frenimit të emigracionit të muslimanëve.

Polakët, austriakët, belgët e hungarezët treguan se ishin më të zellshëm në kundërvënien ndaj emigrimit të muslimanëve në Europë. Vetëm të anketuarit nga Mbretëria e Bashkuar dhe Spanja nuk e kaluan 50-përqindëshin.

Mosha mbi 30 vjeç ka rezultuar të jetë më e prirur për ta kundërshtuar emigracionin e muslimanëve; 63 për qind e të anketuarve mbi 60 vjeç i mbështetën ndalimet ndaj emigrimit të tyre.

Kundërvënia publike ndaj emigrimit të mëtejshëm nga vendet muslimane, thuhet në faqen elektronike të institutit që ka kryer anketimin, është veçanërisht e fortë në Austri, Poloni, Hungari, Francë dhe Belgjikë. /tesheshi.com/