Kryeministri i Kosovës Ramush Haradinaj ka hedhur poshtë mundësinë e bisedimeve për statusin e konglomeratit minierave “Trepça”, në dialogun ndërmjet Beogradit dhe Prishtinës në Bruksel.
Reagimi i tij ka ardhur pas një deklarate të zëdhënësese se Komisionit Europian, Maja Koçijançiç, e cila tha se çështja e statusit të Trepçës duhet të jetë pjesë e dialogut ndërmjet Kosovës dhe Serbisë.
Sipas Haradinajt, ky qëndrim ështe “i papranueshëm, sepse shkel sovranitetin e shtetit të Kosovës”.
“Trepça nuk është çështje e hapur mes Kosovës dhe Serbisë dhe në asnjë moment populli i Kosovës dhe institucionet e saj nuk do të lejojnë krijimin e temave false që kanë qartazi qëllim ndarjen e Kosovës”, shkroi Haradinaj në Facebook.
Ndërsa sipas Brukselit, “çështja e statusit të Trepçës duhet të zgjidhet nëpërmjet marrëveshjeve ligjërisht detyruese për normalizimin gjithëpërfshirës të marrëdhënieve ndërmjet Kosovës dhe Serbisë”.
Parlamenti i Kosovës miratoi ditë më parë një ligj të ri për kompaninë “Trepça”, gjë që zemëroi serbët.
Pas taksës, kjo është përplasja e radhës mes Brukselit e Prishtinës. /tesheshi.com/
