Bjellorusia do t’i falë Serbisë sisteme të raketave anti-ajrore Air Buk dhe avionë të tipit MiG-29, ndërkohë që Serbia do të paguajë për rinovimin dhe modernizimin e tyre, tha për Politika ministri i Mbrojtjes, Zoran Gjorgjeviç, pas kthimit të tij nga Minsk.
Ai theksoi se deri te ky bashkëpunim me rëndësi për Serbinë, është arritur në sajë të marrëveshjes së kryeministrit Vuçiç dhe presidentit Lukashenko, gjatë vizitës së delegacionit të qeverisë serbe në kryeqytetin bjellorus.
Fjala është për dy divizione të sistemit Buk dhe tetë avionëve MiG-29, të cilët pritet t’i dorëzohen Serbisë gjatë vitit të ardhshëm, me të cilat së bashku me një donacion rus të avionëve të të njëjtit lloj, sistemi i mbrojtjes ajrore të Serbisë do të përmirësohet dhe modernizohet në mënyrë të konsiderueshme.
“Bjellorusia që nga kohërat sovjetike, ka një optoelektronikë dhe elektronikë jashtëzakonisht të zhvilluar mirë. Ata, krahas ruajtjes së kësaj teknologjie, e kanë avancuar atë edhe më shumë. Ushtria e Serbisë mund të jetë e interesuar për kamionët e tyre dhe makineritë e ndërtimit, ndërkohë që është i mundur një bashkëpunim me fabrikën e FAP-it”, tha Gjorgjeviç.
Kreu i mbrojtjes serbe, shtoi duke thënë se ka hapësirë të madhe për bashkëpunim, edhe kur është fjala për riparimet dhe modernizimet e sistemeve të armëve të ndryshme me origjinë ruse.
Nga ana tjetër, bjellorusët janë shfaqur të interesuar për karburant raketash dhe për disa produkte të industrisë ushtarake të Serbisë. Gjithashtu është treguar edhe një iniciativë për krijimin e shoqërive të përbashkëta në industrinë e mbrojtjes për paraqitjen e përbashkët në tregjet e treta, përfshirë ato më prestigjioze si Rusia dhe vendet e BE-së, shpjegoi ministri.
Ai vuri në dukje se të dhënat e bashkëpunimit ushtarak midis Serbisë dhe Bjellorusisë do të negociohen nga maji, kur është planifikuar krijimi i një organi të përbashkët për bashkëpunimin në fushën e mbrojtjes, çfarë në fakt ekzistojnë tashmë kur bëhet fjalë për bashkëpunimin me vendet e tjera.
Gjorgjeviç tha se gjashtë MiG-29 së shpejti do të arrijnë në aeroportin e Batajnicës. /tesheshi.com/
