Komisioneri i Zgjerimit të BE-së, Oliver Varhelyi, deklaroi se metodologjia e re e pranimit synon të forcojë procesin e zgjerimit, t’i sjellë asaj një besueshmëri dhe dinamizëm më të madh, por edhe të ruajë qëllimin tashmë ekzistues, që është anëtarësimi i plotë në Bashkimin Evropian.
“Ne duhet t’i trajtojmë gjithnjë e më shumë vendet e Ballkanit Perëndimor si shtete anëtare të ardhshme”, i tha ai Parlamentit Evropian në Strasburg, duke përsëritur se përparësia e Komisionit Evropian është të shpejtojë përparimin e Ballkanit Perëndimor dhe të mbajë një perspektivë të besueshme të pranimit të tyre në BE.
Për këtë qëllim, sipas Varhelyi, ekzistojnë tre drejtime: rinovimi i metodologjisë së procesit të pranimit, hapja e negociatave të pranimit me Maqedoninë Veriore dhe Shqipërinë dhe paraqitjen e një plani të madh ekonomik zhvillimi dhe investimi për rajonin.
Kur bëhet fjalë për metodologjinë e re të procesit të pranimit, Komisioneri deklaron se bazohet në katër parime themelore, të cilat vlejnë si për vendet e Ballkanit Perëndimor ashtu edhe për vendet anëtare të BE-së.
“E para është besueshmëria, që do të thotë se vendet e rajonit duhet të zbatojnë reformat e premtuara dhe BE të bëjë pjesën e vet pas kësaj,” tha Varhelyi.
Ai vlerësoi se besueshmëria e procesit të pranimit në BE duhet forcuar nga një përqendrim edhe më i madh në sundimin e ligjit, funksionimin e institucioneve demokratike, reformat në administratën publike dhe kriteret ekonomike.
“Kur bëhet fjalë për forcimin e udhëheqjes politike në proces, i cili është një parim i dytë, ne presim një angazhim më të madh në nivelin më të lartë me vendet kandidate përmes samiteve të rregullta dhe takimeve ministrore BE – Ballkanit Perëndimor”, tha Varhelyi.
Ai shtoi se qëllimi është përfshirja më e madhe e shteteve anëtare, të cilat tani do të kenë një mbikëqyrje më të mirë mbi procesin dhe reformat.
Parimi i tretë ka të bëjë me një dinamizëm më të madh të procesit dhe përqendrim në sektorët thelbësorë, i cili mund të arrihet duke ndarë kapitujt në zona tematike.
“Vendet kandidate duhet të kenë një panoramë më të qartë të kushteve që duhet të plotësojnë, si dhe të detyrimeve që kanë marrë, por edhe për pasojat negative nëse nuk përmbushen kushtet”, tha Varhelyi.
Komisioneri i Zgjerimit beson se reformat kanë nevojë për stimuj të qartë dhe të prekshëm.
“Nëse vendi po zbaton në mënyrë të duhur reformat, qytetarët duhet të shohin përfitimet e integrimit të përshpejtuar si një hyrje me faza në politikat e BE, tregjet dhe programet e kombinuara me fonde të rritura dhe investime,” theksoi ai.
“Në të njëjtën kohë, vendet anëtare duhet të jenë të sigurt se ka kthyeshmëri dhe veprim korrigjues në formën e sanksioneve dhe ngecjes nëse mungojnë reformat,” shpjegoi Varhelyi.
Varhelyi përsëriti qëndrimin e KE në seancën plenare të PE se Shkupi dhe Tirana kanë përmbushur kushtet për negociatat e pranimit, të cilat duhet të vijnë para samitit BE-Ballkan Perëndimor në maj në Zagreb.
“Ne jemi të bindur se çdo vonesë e mëtejshme nënkupton një rrezik të fortë për të minuar stabilitetin e të gjithë rajonit, si dhe manipulim të mëtutjeshëm të lojtarëve të tjerë që ofrojnë alternativa të rreme për Ballkanin Perëndimor,” paralajmëroi Varhelyi.
Ai shtoi se qëllimi i BE-së është të intensifikojë praninë e saj në Ballkanin Perëndimor, si përmes rritjes së investimeve ashtu edhe tejkalimit të pabarazive kryesore ekonomike që ekzistojnë midis Unionit dhe rajonit.
“Qëllimi është të shpejtojmë ndërtimin e një ekonomie elastike dhe të fortë dhe t’i afrojmë vendet e rajonit më pranë standardeve evropiane më shpejt dhe më afër”, thotë Varhelyi.
Finalja e fjalës së tij qe që përmes planit ekonomik të shpallur për rajonin, BE duhet të gjejë masa konkrete për të nxitur investimet në rajon, të krijojë vende të reja pune, të krijojë një mjedis biznesi më të mirë dhe të ndalojë ikjen e trurit. /tesheshi.com/
